Il Blog dal Crot

San Simon cence pucis

2010-11-03T23:13:00.001+01:00

Stemane passade al è stât assegnât al avocat udinês Adriano Nascimbeni il premi San Simon 2010 pal so romanç "Jo e Luzie un delit di paîs". La zurie e jere plui piçule di chês dai agns passâts, a jerin dentri Turello, Tolazzi, Marchetta (president de zurie) e il sindic di Codroip che però nol votave.

La motivazion dal premi e je stade che "Il romanç al va indenant cun lizerece a la leture e al presente moments di suspance che a rivin a tirâ dentri, no cate la mancjance di montaç tal contâ i fats. La lenghe e cor vie e a dâ colôr ai personaç che però no àn une definizion psicologjiche avonde marcade".
Al è ancje stât segnalât il romanç "O torni par te" di Stiefin Gasti.

La sensazion e je che chest colp, dopo il cuarantevot sucedût cu lis polemichis dal an passât, si sedi volût tirâ flât dant un segnâl di normalitât, cence la a movi masse pucis.
Al jere ancje di cualchi an che il premi nol vignive assegnât ae unanimitât.
Dal rest la zurie e jere su par ju la stesse e la formule e jere plui o mancul compagne, (ancje se chest an no si podevin presentâ contis ma si scugnive mandâ un romanç).

Il probleme atuâl dal premi al è chel di faturâ a intercetâ chel alc di "gnove leterature furlane" che e je e di no rivâ a stimolâle.
Al va ancje dite che se alc al madurirà dal dibatit dal an passât al volarà dal timp. Par progjetâ e scrivi un libri al vûl un grum di timp.

Gasti si è lamentât de modalitât di valutazion des oparis e il so pensîr si po lei sul so blog.

Nascimbeni al à dit di jessi vignût a cognossince dal premi dopo lis polemichis dal an passât, e di vê volût introdusi il gjenar noir inte leterature furlane.
Probabilmentri se al ves cognossût il premi, o se al ves let alc par furlan, al varès savût che intai ultins agns si è za scrit cualchi noir o zâl o cemût che si à voie di clamâlu. Par esempli i ultins doi vincidôrs dal San Simon o lis contis di Zâl par furlan di Spilimberc...
Ma in fin dai conts la colpe no je dome sô.
Il pont critic de cuestion al sta tal fat che ancje cuant che a son i libris no si lein. Cui che al scrîf al varès ancje di lei e la sensazion che o ai jo e je che su chest pont nol faledi dome il puar Nascimbeni.

I trastolons a son cressûts

2010-10-28T10:47:00.001+02:00

Che i trastolons a sedin cressûts e je la batude che dâ il titul a un coment che o ai scrit pe Patrie dal Friûl di chest mês su Isulis, l'ultin libri di poesiis di Stiefin Morat..
La batude e ven pe sensazion che si à che une gnove gjenerazion di scritôrs-poetis, dopo jessisi movude intai agns novante-doimil inte culture underground, (e jessi stade, almancul in cualchi câs, cjalade cu la puce sot dal nâs) e stedi aromai vignint fûr.
A son chei che a àn fra i trente e cuarante agns, partint dai trastolons rivant ai Cappello, ai Santarossa e vie indenant.
A contin par talian e/o par furlan, a contin dal timp di vuê e a contin di nô.

Nossere, ca a Buri, o soi lât a sinti Mattiuzza che al presentave il so biel librut Il derby della luna, che e je stade la mê leture preferide di cheste istât. A son des contis sul balon e duncje des contis su la vite, al è come leisi un Soriano che al vedi la nestre gjeografie.
Usgnot aes nûf Mattiuzza al sarà a Gurize inte ostarie l'Alchimista, se o passais di chês bandis al vâl la pene di là.

PS: Vuê a 'nd è un pocjis a tor:
1) A Tresesin, aes vot e mieze inte sale comunâl e je la presentazion dal ultin numar de Patrie dal Friûl cun Pierluigi Cappello.
2) A Pavie, a siet sorsere inte tratorie Al Cacciatore al ven Massimiliano Santarossa a fevelarà dal sô "Hai mai fatto parte della nostra gioventû".
3) A Codroip ae stesse ore e je la cerimonie di premiazion dal Premi San Simon.

No molâ

2010-10-13T22:27:00.006+02:00

O met un dôs fotos dal conciert par Onde Furlane di Sabide stade a Cjasielis.

Tante int.

Tante musiche.

I fruts di fûr a zuiâ cul fûc fin che nol tocje tignîju in braç.

Nol ven voe di molâ.

Crot e corsâr.

2010-09-18T21:00:00.002+02:00

La polse e je stade lungje, prime un doi mês masse incasinâts e dopo o ai pensât di saltâ l'istât.

Cumò o spietavi dome l'ocasion juste par tornâ a scrivi alc e cuant che al à tacât a plovi o ai capît che al è tornât timp bon pai crots.
Mi somee che al stedi plovint ben e no mal ancje sul furlan e lis ombrenis no son une prioritât....

Ma par no jessi masse serios o ai cirût un video che al ledi ben pe ocasion. Alc su la piratarie.
Crot e corsâr!

Za fa 100 agns

2010-03-29T22:20:00.003+02:00

Come che nus conte l'ultin numar dal Diari, vuê a son 100 agns di cuant che al è nassût Tarcisio Petracco.

Za fa cualchi an che o ai let il so libri su lis lotis par rivâ a vê la Universitât furlane.

Se o fossin a Hollywood di une storie cussì si podarès tirâ fûr un filmon, une di chês bielis storiis pai dirits plenis di colps di sene, ribaltons e emozions.

Ma no je une storie inventade e je sucedude dal vêr.

Nô o sin chei dal burca.

2010-03-08T23:06:00.001+01:00

O ai simpri cjatât lis polemichis fatis in Italie par improibî il burca une stupidade.

Intant ca di nô nol è che al sedi un grant probleme par vie che no son tancj i imigrâts musulmans che a rivin des nazions dulà che si lu dopre.

Ma la cuestion vere e je une altre.

Dut ce che si dîs cuintri il burca al sarès fat pe emancipazion feminine des imigradis, par che deventedin libaris e no sotanis dal om.

Po ben se o lin a cjalâ la classifiche mondiâl des paris oportunitâts o viodin che la Italie e je 77esime, la ultime, o cuasi de Europe e dai paîs siôrs.

La reson e stâ tal fat che ca di nô lis feminis no rivin tai puescj di comant. A van ben dome come cui e tetis di mostrâ pe television.

Crodêitmi, chei dal burca o sin nô.

Furlans cence plume

2010-03-04T23:49:00.005+01:00

E sta vignint su une gjenerazion di furlans che no varà fat l'alpin. Aromai un dai "fondaments" de furlanetât nol esist plui. Al va dite che za di un biel pôcs di agns la robe e clopave. Prime par vie dai pompîrs dal dopo taramot, dopo cui obietôrs che a fasevin il servizi civîl. Fat al è che aromai di cualchi deceni no ducj i furlans a àn vût di puartâ il cjapiel cu la plume.

Ma di cuant che la leve obligatorie e je stade gjavade chê che e someave plui une leç di nature che un destin e je muarte li.

Chel dai alpins al è par sigûr un dai cuarps plui singolârs dal esercit talian. Il leam cul teritori di provignince dai soldâts nol à paragons in Italie. Jo robis similis lis ai viodudis dome in Gales e in Scozie cui reziments locâi che e an scombatût pal imperi britanic.

Une vore particolâr al è il leam che i alpins a tegnin fra di lôr dopo jessi tornâts civîi. Trops sono i paîs furlans cuntune cjase de associazion dai alpins par solit metude a puest di lôr?
Dut chest probabilmentri nol sarà plui.

Al di là des retorichis militaristis (e di chês antimilitaristis) no sai disi trop che al sarà un ben e trop che al sarà un mâl.

I furlans dut câs a esistevin ancje prime dai alpins e probabilmentri a esistaran ancje dopo.

Tacant Sgorlon

2010-02-10T23:28:00.003+01:00

O stoi par tacâ a lei il gnûf romanç par furlan di Carlo Sgorlon, Ombris tal infinît.

O ai di disi che o tachi il libri cun curiositât ma ancje cun cualchi prejudizi.

La curiositât e je tante. Intal imprin al va dite che si reste viodint cheste necessitât che al à vût di tornâ al furlan ae fin de cariere e, cumò che o savìn, ae fin de vite. Dopo e je la voie di viodi cemût che e je la opare, parcè che Sgorlon al jere un naradôr vêr, un che al saveve contâ storiis cuntun mistîr che nol è facil cjatâ in altris autôrs furlans. O ai ancje curiositât di viodi il furlan che al à doprât.

No tâs però i prejudizis che o ai tal tacâ la leture.

Di sigûr ciertis atmosferis e ambientazions che al à contât tes sôs oparis, a jerin verementri furlanis (tal sens che un furlan lis rive verementri a capî) e a son dai personaçs che al à inventât memorabii (e tantis di lôr a son feminis).
Ma Sgorlon, probabilmentri ancje par motîfs gjenerazionâi, nol è mai stât il gno scritôr.

Intant o met l'incipit dal libri:

Fatime Nissim, une biele zovine persiane, di pôc parsore dai vincj agns, e rivâ a Sant Martin, un paîs de Basse, dopo vicendis une vore complicadis. Culì e podè viodi subit che l'inzignîr talian che al jere stât so amì te citât di Abadan no i veve contadis bausiis. Di fat tal borc e cjatà prontis par jê, intune cjase di contadins, lis trê stanziis che i vevin prometudis.

O pensi che la Filologjiche Furlane, che e à curât la publicazion dal libri, e vedi une vore di braure par cheste opare. Sigurementri un aveniment pe leterature furlane.
O ai dut câs di fâi une critiche. A mi i libris mi plâs cjalâju, voltâju, nasâju prime di tacâju a lei. Une robe che no mi plâs dal libri e je la cuviertine. Par jessi elegante e je elegante e a son altris libris de filologjiche che a àn il stes stamp di cuviertine, come imagjine al è un biel cuadri di Van Gogh. Però il risultât finâl al è une grafiche che podeve jessi biele trente agns fa ma vuê e somee vecje.

Chel des cuviertinis al è un piçul probleme dai libris furlans. Di spes lis sieltis, magari par incompetence, magari par mancjance di snait o par cuestions economichis, a son sbaliadis e a rindin un libri pôc invidant.

Dut câs se o cjalin la narative di cualitât furlane dai ultins agns, chê de Forum, chê de Kappavu, ma ancje la golaine di narative furlane de filologjiche, lis cuviertinis no son nie mâl. Il puar Sgorlon si meretave alc di miôr.

Bon viodarìn cemût che al è dentri.

Faune multietniche.

2010-02-05T22:54:00.006+01:00

Al è un gnûf animâl che si cjate pes aghis de basse. Al ven dal sudameriche e al samee un castôr, il so non al è nutrie.

Al è rivât ca di no intai arlevaments pes pelicis. L'afâr nol è lât ben, cualchi animâl al è scjampât, altris a son stâts molâts cuant che a an sierât i arlevaments. Fat al è che, cence nemîs naturâi, la bestie si è cjatade benon e e je deventade masse numerose.

Il probleme al è che e à il vizi di fâ busatis, robis che un farc si sumie. A lis fâs tai arzins dai flums e dai canâi, disfant su dut.

Ce fâ?
Al è cui che al propon il lôr stermini e cui che al dîs che no van tocjâts...

Si à la tipiche reazion taliane ai problemis globâi; nissun si interesse par timp e cuant che la cuestion e sclope si compuartisi in maniere isteriche.

30 agns di Onde Furlane

2010-02-02T22:50:00.002+01:00

Come vuê 30 agns indaûr e nasseve Radio Onde Furlane.
I vevin dât sîs mês di vite ma e je ancjemò ca.

30 agns no son migo pôcs, cumò e je la ore di meti il cjâf a puest e di pensâ a maridâsi!

Il sium impussibil pal Friûl e sarès il vê une television furlane. In fin dai conts se o sin rivâts a fâ une imprese cussì cu la radio parcè no varessino di sperâ.

Al siere lenghe.net

2010-01-26T23:37:00.002+01:00

Si ferme lenghe.net che al è stât un dai sîts storics de Internet furlane.

Tal ultin editoriâl di Anna Bogaro si pues lei la storie di cheste impuartante aventure dal mont gjornalistic furlan.

Se di une bande si viôt la strache, la amarece ancje polemiche e la delusion di Anna, di chê altre si cjate la promesse di tornâ "in curt in vore cuntune altre muse, une altre struture e altris obietîfs, simpri su Internet".

Jo che di spes o soi passât par di là a viodi se e jere cualchi gnove, cuntun pocje di malincunie, o ringrazii Anna e chei che le àn judade par dut chel che a àn fat in chescj agns.

Befanis furlanis

2010-01-06T16:36:00.003+01:00

Inte interpretazion moderne de Befane lis feminis si mandin fra di lôr i auguris vie sms...
No sai cui che e je la autore di chest messaç ma mi somee cussì biel che e valedi la pene di zirâlu a dutis lis befanis che passin par di ca.. :-)

La befana vien di notte.... cence scove e dute crote,
si è stufade la vecjute di sei puare e dute brute.
Biei vistis e scarpis netis, di silicon lavris e tetis,
e mande ducj a fasi un zîr e cun l'aereo e va in Brasîl.
Par ogni Befane come me la vite gnove e comence vuê.
Auguri!

La conte di Nadâl di Paul Auster

2009-12-25T22:06:00.004+01:00

O soi rivât a la sere di Nadâl strac e cu la panze plene dopo vê mangjât dut il dî come che si fâs a ogni Nadâl. Par dute la zornade mi à sbisiât tal cjâf la cjançon Innocent when you dream di Tom Waits. Al è sucedût che îr sere, tal ultin moment di pâs di chescj diis, jo e la me femine o vin tornât a viodi, dopo tancj agns, il film Smoke. Si visavin che ae fin dal cine e jere une biele storie di Nadâl ma no si visavin di trop biele che e jere.

La conte e je in realtât la Auggie Wren's Christmas Story di Paul Auster. Graziis a internet o met il video dal finâl, cussì, magari, ancje a voaltris ûs sbisiarà un pôc Tom Waits parcè che o sin ducj inocents cuant che si sumiin.

Bon Nadâl.

I regâi di Sante Lussie

2009-12-13T22:07:00.003+01:00

Sante Lussie e je rivade e e à lassât i regâi pai fruts.

A Sante Lussie no si domandin robis, e puarte je ce che a voie (no je mighe Babbo Natale!). E puarte cjocolatins, caramelis, bagigis, mandarins e alc che al à di jessi util. Chest àn e à puartât matitis e colôrs, une vore biei...

Come che si viôt te foto e à bevût il lat e mangjât i biscots. Ancje de carote nol è restât cuissà ce. Viodin se o rivais a induvinâ cui che al è il mussut che al à scugnût roseâle?

E rive Sante Lussie

2009-12-12T22:35:00.003+01:00

Usgnot e rive Sante Lussie. La me femine e gjolt come une mate a preparâ chestis robis cui fruts e alore, dopo vê ben ben traficât, a àn prontât il bon acet pe Sante.

Inte foto si viôt la carote pal mussut e il lat e i biscots pe Lussie.

Naturalmentri la puarte e reste nome sierade dongje par lassâle jentrâ e i fruts a son lâts a durmî ducj emozionâts.

Doman us contarai ce che e varâ puartât...

Indigjens bisiacs

2009-12-08T22:35:00.005+01:00

Si fasaraie une centrâl nucleâr a Monfalcon? Al è un toc che si sint cjacarâ di cheste idee e vuê e je vignude fûr une liste (subite smentide di bande dal Enel), dai puescj dulà che si pense di podê fa su lis centrâls nucleârs talianis. Fra chescj al è ancje Monfalcon.

Si sa che la int di chês bandis ca e à di fa il zûc di scuadre e sta cidine. Po dopo in cualchi lûc lis centrâls e saran ancje di fa. E cheste e à di jessi par nô une sielte prioritarie, une oportunitât strategjiche par il ben di ducj e bla bla bla al cjacare il mus.

Ma viodût che si fevele propit di Monfalcon e pensant a cemût che a stan lant i procès par i disgraciâts velenâts dal amiant a mi la robe mi puce.
Cuissà parcè ma mi ven iniment chel capolavôr di inzegnerie che e jere che biele dighe che a vevin fate sul Vaiont...

Isal pussibile che cuant che si fasin chês robis a chi in Italie, viodint cemût che e ven tratade la int, plui che oparis par l'interès de comunitât a someedin simpri des oparis coloniâls?

Nus salvarano i gnognos?

2009-11-20T22:28:00.002+01:00

Il gnognoblog di Dree mi è stât une vore util cheste setemane che o ai vût il frut pi grant a cjase cu la influence. (il piçul, cjan dal ostie, al ten invezit dûr... sperin che al duredi...).

Come che o vevi za contât il fi al è un fan di Momo, Martin e compagnie, par chest ogni dî al è lât a viodisi lis novitâts dal gnognosît par cirî se a jeri dai gnûfs gnognogaget di colorâ.

Usgnot mi à ancje dite che a pene che al ven fûr i ai di comprâi il gnognolibri!!

Gnognoneologjisim di zontâ al Pirona?

San Simon 2.0 ?

2009-10-29T17:22:00.002+01:00

Al è stât assegnât il premi leterari San Simon pal 2009. Al à vinçût il romanç "Coventave vê pora?" di Alberto Luchini cun cheste motivazion "Un pinel cjatât ta un supermarket al devente stroment di indagjin interiôr: al salte fûr un cuadri dulâ che, tal rapuart di un omp cu la sô femine, ancje i lûcs comuns a vegnin acetâts intun contest di cotidianitât mai esaltade ni esecrade e dulà che il sens dal dut al polse intune inelutabile dissipazion de esistence."

E je stade ancje segnalade de zurie la opare "Dôs di trê" dal brâf furlan Stiefin Gasti. Storiis al di fûr dal Friûl tradizionâl, te prime si fevele dal unabomber, te seconde di un serial-killer di prostitudis a Udin intai agns 70.

La zurie presiedude di Carlo Tolazzi e veve dentri Franco Marchetta, Mario Turello, Giacomo Vit e Aldo Colonnello.
In confront al mieç disastri dal an passât ste volte a son stadis presentadis 12 oparis, di chestis, pe zurie, uns trê a vevin la dignitât dal romanç.

Carlo Tolazzi al à pensât ben di mandâ un coment al Messaggero dulà che al al pant lis ideis de zurie su li oparis presentadis e su la situazion de narative furlane di vuê.

Tolazzi al dîs un sac di robis interessantis e o pensi avonde condivisibilis. Su plui robis al sarà il câs di tornâi parsore e di viodi ce coments che a vignaran fûr ancje su la stampe.

Fra lis stiçadis intrigôs il toc sui colaboradôrs de Comugne che "par snobisim o par incapacitât di rezi la lungjece dal romanç" no partecipin al San Simon...

Blogarins argjentins

2009-10-25T22:03:00.005+01:00

O ai di pôc cjatât uns doi blog furlans scrits di là de (grande) aghe, in Argjentine, nassûts pe passion di Galliano de Agostini:

Leturis " di ca da l'aghe ", Storiis di une volte... e Il taller de furlan

Bielis ancje lis pagjinis di Eduardo Baschera che al conte dal so viaç a Braça par viodi la tiere dai siei vons

Fasìn ridi il gjornalist

2009-09-24T22:58:00.005+02:00

Tornant ai famôs atacs de stampe nazionâl cuintri il furlan e al fat che lis traduzions par furlan di autôrs forescj a son un scandul e a fasin ridi (il sot titul di un dai articui al jere plui o mancul "In Friûl si spindin milions di euros par fa traduzi Brecht (...), e plui indevant al continuave disint che (...) Spietant Godò di Samuel Beckett, par furlan al somee plui prose comiche che teatri dal assurt.)

Bon, o ai pensât di fâi un plasê a Giulia Calligaro e a Raffaele Oriani fasintju gjoldi ancjemò un pocut cuntune liste, a disi il vêr fate di corse, di autôrs che a son stâts voltâts par furlan:

Dante Alighieri, La Bibie, Boccaccio, Omero, Virgilio, Shakespeare, Moliere, Pirandello, Cechov, La Fontaine, Frederic Brown, Isaac Asimov, Martin Buber, Bertolt Brecht, Antonie Saint-Exupèry, Esopo, Fedro, Hemingway, Nievo, Ginzburg, Von Hofmannsthal, Arthur Conan Doyle, Dostoevsky, Collodi, Garcia Lorca, Esiodo, Saffo, Tenesse Williams, Juan Ramón Jiménez, Kafka, Beckett, Orwell.

O lassi ai doi gjornaliscj, cuant che varan finît di vaì dal ridi, di cirî cualis des traduzions a son stadis finanziadis de regjon e cualis che a son stadis fatis gratis. O conti sul fat che a son brâfs a verificâ lis notiziis.

E je muarte Novella Cantarutti

2009-09-20T22:27:00.007+02:00

O soi tornât a cjase di PordenoneLegge cu la brute gnove de muart de plui grande poete furlane, probabilmentri masse pôc cognossude fûr dal Friûl.

E doprave il furlan di Navarons, o met une de sôs lirichis plui famosis.

I sielç peravali’

I sielç peravali’
Come i corais, da nina,
ch’i fasevi
intor dal cuel
caroni’ lustri’.
I sielç peravali’
Penzi’ di mâl da vivi,
par caroni impiradi’
di piera sorda

Novella Cantarutti (1920-2009)
La foto e je di Danilo De Marco

La normalizazion de cuestion furlane

2009-09-03T23:54:00.004+02:00

Dopo chel dal Espresso al è rivât vuê un gnûf atac al furlan di bande dal magazine Io Donna dal Corriere della Sera. Stino par assisti a une normalizazion o almancul a un bon ridimensionament de tutele de lenghe?

Il sfont dai aveniments al è, a disi il vêr, lis elezions dal prossim an in Venit e in Lombardie dulà che la Leghe e somee in corse par cjapâ dutis dôs lis presidencis, e naturalmentri dut il cancan che chel partît al à fat cheste istât pe tutele dai dialets regjonâi.

Bon, alore vie cun dai biei reportage su la straçarie dai bêçs pal furlan. In doi articui si critiche chel pôc fat a scuele, pe television, tai cartei. Si critichin lis traduzions e i vocabolaris. Naturalmentri si butin dentri tal cjalderon ancje dutis lis robis fatis cence contribût public come la Bibie par furlan, il Firefox furlan e la Vichipedie disint che a fasin ridi.

Implicits tai articui a son une schirie di premessis che a somein fa part dal patrimoni culturâl di masse talians:
il furlan al è un dialet come chei altris par chest ducj i discors su la tutele des minorancis linguistichis proviodût de Costituzion e dai tratâts europeans al cole parcè che il furlan nol è une lenghe;
cui che al fevele il furlan (il dialet) al è une persone di basse culture, di bas nivel sociâl, cuntune vision sierade dal mont;
cui che al fevele furlan (e chest nol val par ducj i dialets talians), al è razist viers i talians de basse Italie e viers i forescj;
cui che al fevele furlan al vote pe Leghe Nord;
dut ce che si fâs pal furlan al è anacronistic e al è une strassarie;
dut ce che al è fat par furlan al è di scjars valôr o, tal câs miôr, al è timp pierdût;
la tutele dal Furlan, dal Sardagnûl e des altris minorancis al è un pericul pe unitât de Italie

Cumò jo o pues jessi favorevul o mancul al T9, o pues criticâ o mancul la grafie di Lamuela e il dizionari bilengâl, ma chel che si ven contestânt verementri al è il ricognossiment juridic dal furlan e il fat che al ledi tutelât.

La liste siet vot (..libris)

2009-08-18T23:57:00.003+02:00

A son tantis manieris par indicâ des cuantitâts a voli. Une disine, une dozine, une cincuine, un pâr di lôr, un trê cuatri...

Une di chestis manieris che o ai notade une vore doprade, almancul des mês bandis, al è il mût di dî siet vot.
Disi un siet vot a vûl dî indicâ un numar plui grant di cinc e plui piçul di dîs. Une cuantitât avonde grande ma no masse grande. Un tant just.

Stiçât di une liste di dîs robis di fâ cjatade là dal Brâf Furlan o ai pensât di proponi lis listis siet vot.

La liste siet vot mi plâs plui di un decalic parcè che no si scugne meti dentri par fuarce dîs robis, po dopo l'ordin nol conte, nol è che il cinc al valedi plui dal sîs!

Par fâ viodi cemût che al funzione o tachi cu la mê liste dai miôr siet vot libris (furlans) di puartâsi sot dal ombrelon.

1. Donald dal Tiliment di Stiefin Morat ven a stâi il furlan caraibic dai trastolons, al è dificil tacâlu, jo o ai scugnût fâlu plui voltis, ma une volte partîts no si à plui voie di molâ il libri: straordenari

2. Niari di Fulvio Reddkaa Romanin, dal furlan caraibic a chel di Fors di Voltri, il libri al sarà mancul ambiziôs di altris ma si gjolt un grum. Mi domandi ce chê si sarâ fumât l'autôr par impensâsi une storie cussì. Cui che al si stufe dal furlan tal libri al cjate ancje une conte horror par talian: pengjo pulp

3. Gilez di Franco Marchetta su chest o scugnarai tornarai parsore parcè che lu ai let di pôc e o ai tantis robis di contâ: bielissim

4. La maree nere e altris contis di Checo Tam cuant che lu vevi let mi jere tant plasût: dark furlan

5. La Gjandusse di Sandri di Sualt, un zâl di investigazion intun librut di un biel pôcs di agns indaûr, se o vês voie di leilu no sai propit cemût che o fasarès a cjatâlu, forsit si à di provâ in cualchi biblioteche. Nol è un capolavôr de leterature mondiâl ma l'autôr al jere une vore indenant pai siei timps: vierzi trois

6. Il cjâf dai furlans di Franc Fari un biel saç plen di pensîrs stimolantis, l'ideâl par fâ biele figure in splaze: sticeboris

7. Manuâl critic dal ort di Stefano Montello al è il libri che o stoi realmentri leint sot dal ombrelon intant che la femine è je rivade al tierç di Stieg Larsson: une vore biel

O spieti conseis pe liste dai siet vot libris che o ai dismenteât di puartâ sot dal ombrelon.

Il Boss, il sudôr e la idee di Americhe

2009-07-24T15:05:00.003+02:00

E sarà dute imagjinazion ma a son tantis lis Americhis che a vegnin iniment. E je la Americhe dai Madoff, de finance cence cûr, des speculazions, des trufis, la Americhe dai Cheney e dai Bush, des torturis a fin di ben e des vueris atôr pal mont.

Ma dongje cheste e je une Americhe dal sudôr, di chei che a pierdin il lavôr par vie des speculazions, di chei che inte vuere a van a murî, di chei che a lavorin, che a fasin su lis robis. Une Americhe de democrazie vere, une Americhe dai dirits, dai siums, e vignarès di disi une Americhe de int.

O sai benissim che e je dute imagjinazion, e che la realtât no je propite cussì, ma îr di sere la seconde Americhe imagjinarie si è materializade tal conciert di Springsteen.

Al à ancje fevelât alc par furlan, si è presentât incitant par trê voltis "mandi Udin".
Plui indenant al à dite "o soi content di jessi chi chesta sera" e ae fin al à saludât, pronunciant a disi il vêr ae francese, "adiu Udin".

Musiche fuarte, potence e sudôr par scuasit trê oris. Il Boss nol è un che al si sparagne, someave rock di altris timps, rock par manovâi.

Dut une vore biel.

Bidon digijtâl

2009-07-15T22:51:00.002+02:00

A son tacadis ancje ca di nô lis provis gjenerâls pal passaç ae television digjitâl.

Cualchi zornade indaûr nus jê tocjât risintonizâ il prin cjanâl de television. Dut câs la rivoluzion definitive e rivarà di ca a un an cuant che a spariran i cjanâi analogjics e par viodi la television al coventarà par fuarce vê il decoder.

A mi chest digjitâl, cheste grande inovazion tecnologjiche che nus sarès comandade de Europe, mi somee une cagade (scusait l'italianisim).

Intant come gnove tecnologjie e je dut fûr che gnove. Par viodi miôr si viôt miôr ma la interativitât e je robe preistoriche (ma chei che nus la contin sano che a esist Internet?).

Se dopo o lin a viodi i tancj operadôrs gnûfs che a varessin di jessi o viodin che son simpri chei doi, i cjanâi gnûfs de Rai a son di replichis di robis vecjis e chei de Mediaset a son a paiament.

Regjistrâ alc par viodisile une altre volte al sarâ un casin o se no si varâ di comprâsi televisions e regjistradôrs gnûfs.

Naturalmentri cun dut ce che e varâ di spindi la RAI pai gnûfs ripetidôrs nol sarâ il câs di lâi a domandâi di meti in vore ce che al sarès proviodût pe tutele dal furlan, almancul par cualchi an...

Intune ostarie o ai sintût dî di cualchi von che il digjitâl al covente dome par fâ viodi inte television a paiament ce che une volte si viodeve gratis, ma ce vuelistu che a capedin in ostarie, là a son ducj sotans.

I vantaçs dal bilinguisim

2009-07-10T23:08:00.005+02:00

Al è stât publicât sul Science magazine un articul sui vantaçs dal bilinguisim.

I risultâts de ricercje a confermin ce che i studiôs a disin za di timp, ma in chest periodi, dulà che al somee jessi in vore un tentatîf di ridimensionament de tutele dal furlan, al è ben ricuardâsi (nô par prins) cuai che a somein jessi i zovaments di une educazion multilengâl dai fruts.

O sai che al è dificil fâlu par vie di ducj i condizionaments sociâi che o vin e jo lu ai provât sul mio gropon cui miei fiis!
Ma il fevelai furlan ai fruts no dome al è naturâl, al è just e al è un dirit, ma i fâs ancje ben.

Cemût il Quad?

2009-06-27T15:05:00.005+02:00

La mê polse come blogarin, che e veve di durâ nome il mês di Mai, si è slungjade par scuasit dut Jugn...

Intant a 'nd è sucedudis di robis, sedi chenti che atôr pal mont. Plui di cualchi volte mi sarès plasût tacâ cualchi coment.

Stant che di cualchi bande al e miôr che o scomencedi o met un tucut di satire, che e stâ simpri ben.

Intune maniere che al è ben no spiegâ o ai vût in man lis brutis des gnovis zontis al vocabolari furlan. Come che o savês, par sparagnâ, il lavôr al è stât dât in apalt fûr regjon, cheste no je di sigûr la version definitive ma za cussì si rive a fâ capî il grant valôr de opare in vore.

Bighe; dal latin bigum al jere il cjar tirât di doi cjavai che al vignive doprât dai romans par cori atôr

Cemût la bighe?; espression tipiche di origjine latine, probabilmentri aquileiese, al ven a significâ cemût vadial il to cjarut? Al dì di vuê, tal lengaç zovanîl, si dopre plui di spes la espression cemût il Quad? par informâsi su lis prestazions dal mieç di locomozion. La rispueste tipiche e je al è cjalt ma al è flap, parcè che si sa che il Quad nol à une grande autonomie e al a tindince a scjaldâsi masse. Si dopre di spes ancje la espression Tu âs il Quad di fûr che e serf par visâ che al stâ par tacâ a plovi e che al è miôr meti il Quad intal garage.

corot par Marino Plazzotta

2009-05-21T20:42:00.005+02:00

Stamatine al è muart Marino Plazzotta.

Mi plasarès savê cjatâ cualchi peraule di Pre Toni par dâi confuart a la femine e ai fiis ma o rivi dome a tasê.

Mandi Marino.

Finiraial Mai?

2009-05-11T00:24:00.004+02:00

Mai al è simpri un periodi un pôc incasinât par me, no viôt la ore che al finedi!

Intant che o pensavi chest mi soi visât che Mai e je une di chês peraulis che e pues vê plui significâts diferents.

E alore par chest mês o mandi indenant il blog zuiant un pôc cu li peraulis come Mai.

Ve ca cualchi fufignute

1. Cuant ti darano i bêçs?
"Mai a Mai mai daran"

2. "Dîs 10 dîs "
(cheste a ven ben dome dulà che il numar si lei dîs e no deis come che a disin par esempli a Codroip)

3. Masse pacific:
"Ninin anin un ninin indenant!"

4. Ce âstu viodût?
"un crot crot sul cret o crôt"

La ultime e jere autobiografiche....

Fradis

2009-04-06T22:48:00.004+02:00

Cuant che o sint lis notiziis di un taramot, che al sedi ancje lontan vinç mîl chilometris, o resti simpri fer ingropât cuntun sens di apartignince che dome cui che al à cognossût l'orcolat al pues capî.

I miei a son ricuarts di frut, là che o jeri jo di dams a 'nd erin stâts pôcs. Lis scossis dal Setembar in particolâr a vevin lassât cualchi crepe su la vecje cjase e la Primevere dopo o sin lâts vie e o sin vignûts a Buri.

O sin lâts intes cjasis popolârs gnovis. Li a jerin ancjemò diviersis fameis di Glemone, di Vençon e di altris puescj dulà che al veve pocât un pôc plui fuart. A jerin fameis zovinis puartadis ca vie par passà l'unvier.
Al jere plen di fruts. O vin zuiât tant.

Dal Mai dal '76 mi visi la pôre, mi visi di mê e di gno fradi metûts a durmî in machine; la vecje maggiolino di gno pari. Mi ricuardi lis gnots in tende...

Il pensîr cumò al va a la gnot che a passarà la puare int dal Abruç.
Tignît dûr fradis.

E torne primevere

2009-03-22T22:58:00.007+01:00

Il cliput si sint e no si sint.

Par intant e continue a durmî lizere, ma ancje chest an e je tornade la vierte e come simpri nus puarte un pocje di ligrie e di sperance.

La foto e je di vinars stât cuant che su la meridiane de mê cjase si je tocjât l'ecuinozi di primevere.

Mitologjie falade

2009-03-19T23:49:00.003+01:00

Cu la disocupazion che e sta cressint a cressarano ancje lis tensions cuintri i imigrâts?

O volti la riflession in une altre maniere: isal il nestri un paîs razist?

Ai talians i plâs pensâ di no, anzit e je dute une mitologjie daûr che e propagande la idee dal talian "brave int", bon di cûr cun ducj ancje cuant che il câs o la storie lu met in situazions dificilis.

Il talian al sarès stât bon in vuere, bon intes coloniis, bon cui ebreus e sot sot al varès simpri boicotât lis leçs raziâls e i ordins no juscj dai siei sorestants.

Cheste biele mitologjie si je vuastade cul probleme dai imigrâts. Chel fenomen gnûf dai ultins cuindis-vinç agns dulà che la presumude bontât e varès vût di vignî fûr.

Cussì nol è stât e anzit in tancj a àn tacât e a continuin a meti su fûc cuintri i forescj.

La problematiche e va di sigûr frontade ma tantis des robis che vegnin fatis o proponudis mi fasin dome che vignî i sgrisui.

Cuant che al capite cualchi biel sassinament la prime notizie che e ven fûr e je che a son stâts dai stranîrs, probabilmentri sclâfs, rumens o nordafricans. Magari dopo si scuvierç che e je stade la fie cul morôs o che a son stâts i vicins di cjase.

Masse voltis o fâs fature a pensâ che cheste e je la nazion dulà che o vîf.

Cun tante int che continue a semenâ aiar o ai voie di viodi ce che si seselarà.

Pôre

2009-03-16T22:36:00.003+01:00

Cheste crisi e je propit brute!

Ancje psicologjichementri e je dure di frontâ. Un al crôt di fa ben il so, di lavorâ cun passion, di impegnâsi, di fâ alc di bon e di valevul. Ma dopo dut atôr si imberdee.

Dutis chês fabricutis che o vin sparniçadis pe furlanie a son fermis e a spietin.

Trop podarano lâ indenant se alc nol gambie?

E la sensazion e je che nissun, ni chenti, ni a Rome, ni atôr pal mont, al savedi verementri ce fâ.

Respirant planc e stant in vuaite si cjale lontan cun sperance che al rivedi alc di bon e cu la pôre che e rivedi invezit la lavine, l'orcolat, e che e sdrumedi su dut.

Il poleç di Buri

2009-02-26T22:37:00.003+01:00

Chest an a Buri si votarà pal comun ven a stâi che il paîs al è dut un cantîr!

Vuê no ai voie di fâ un discors ni pro ni cuintri, ancje se la mê opinion su diviersis di chestis oparis le ai.

Ce che dut câs o ai voie di disi al è che l'an des elezions si fâs propite un grum di fature a lâ atôr pal paîs!

Nol cate cui che al è il sindic, nol impuarte ce che si è fat prime o ce che al covente verementri fat. L'an des elezions si à di fa sù, si à di spindi e si à di pesseâ a fâ viodi!

Par cumò dome tant fum, se sot al è il poleç e ce savôr che al à lu savarìn plui indenant.

La Quiete

2009-02-09T21:55:00.002+01:00

Cheste e je la gnot dal cidinôr
i cjans
che par agns a àn tasût
ch'a ledin a vuacâ di une altre bande

Il savê fâ

2009-01-19T22:24:00.003+01:00

Cuissà se la Russie e la Ucraine a àn za finît la vuere dal gâs ma intant une piçule bataie si je scombatude ancje a cjase mê. No sai ben se par colpe dai rus o dai ucrains, fat al stâ che stemane passade mi si è rote la cjalderie: nie aghe cjalde e nie riscjaldament!

O ai subit scugnût doprâ lis riservis strategjichis: vistîts pesants par stâ in cjase, cusinute economiche e stufutis eletrichis a manete, borsis de aghe cjalde e vie a sfladâ i termosifons, a lei il manuâl dal imprest e a traficâ cul termostat.

La situazion no si è risolvude e ae fin o ai scugnût passâ de mê cognossince virtuâl de cuestion a chê vere dal tecnic che, un cuatri dîs dopo, cuant che al è rivât, intun vinç minûts al à sistemât la robe.

Cuissà se saran il lavôr vêr e la economie reâl, a puartânus fûr di cheste crisi economiche (che somee propit brute) e che e je nassude de masse economie virtuâl.

Par intant l'unvier al somee frêt e une vore lunc...

Ce sglonfe de ploie!

2008-12-12T22:51:00.002+01:00

Lis zornadis di ploie a son une robe dute particolâr, comunementri si dîs che a son brutis e di sigûr nus dan cualchi fastidi ma a àn dai savôrs e dai odôrs inconfondibii.

Sarà une cuestion di umiditât, sarà parcè che o sin ducj un pôc meteropatics, ma dut al va un pôc plui planc, i sunôrs si cuietin, la int ti stâ un ninin plui dongje, magari nome par fevelâti mâl dal timp, e parfin il mignestron (o il brût) a àn un savôr dut lôr.

Ancje contâ ce che al sucêt si lu fâs cuntun sun une vore dolç disint che al plûf e cussì fasint si descrîf un stât di riverence viers la nature.

Sperin che il Riul-la Tor-il Nadison-il Tiliment a stedin bogns cheste gnot. No o stin fers ca, imbombâts sot de aghe.

Vitalizi a Tavan

2008-11-28T22:23:00.003+01:00

Vuê il guvier talian al à assegnât a Federico Tavan il vitalizi de leç Bacchelli.

O crôt che al sedi il moment di disi brâfs a chei che a si son metûts in vore par rivâ a chest risultât.

Il scûr al è ancjemò tant ma cheste sere o soi content.

Maladeta chê volta
ch'ai tacât a scrive
no parcè che al è mâl scrive
ma parcè che
era maladeta chê volta
che ere belsoul
e vaive
e par chist
e scriveve

Federico Tavan

Il pironut

2008-11-19T23:42:00.004+01:00

Il gno nini plui piçul al stâ tacant a cjacarâ. Par intant lu capìn dome nô in famee e alore, lassant sbrocâ un pôc la mê braure di pari (e vûl ancje che!), o ai butât jù une liste des peraulis che al è bon di doprâ.

Dopo vêle lete mi rint cont di dôs robis, la prime e je che il so al è verementri un mont piçulut dulà che dutis lis robis a finissin cun ut, ute, in e ine: un mont par frututs.
La seconde e je une domande un pêl plui intrigose; nol è che se nô, il pari e la mari, o scomençassin a tabaiâi in une maniere plui corete al impararès a fevelâ miôr e prime?
Bo!?

Intant ve ca la liste; il Pirona dal frut.

ute = e à diviers significâts a secont dal câs e pues volê dì: orelute, bocjute, maiute, manute, scarpute
ut = pidut, dedut
us = piduts, deduts
'sut = nasut
pnsute = panzute
rut = librut
ftute = fete di naranç o di mandarin
adi = formadi
bibi = biberon
at = lat
patata = pataçutis, miôr se saladis
ogur = yogurt
piza = pize
pan = pan
bau = cjan, par estension animâl grant
uti = tuiuti, gjatut
mao = gjat
vâl = cjaval
cuà = raze, par estension uciel
mama = mame
papà = papà
gjbin = gjubin, par estension o ai voie di lâ fûr
ins = cjalcins
utis = scarputis
bravo = viôt ce brâf che o soi stât
ami = dami
chiale = cjale, par estension cjale ce che o ai fat, viôt ce che o ai in man
fûr = o ai voie di là a zuiâ di fûr
olât = al è colât, mi è colât, al è par tiere
cjao, manman, mandi = mandi

Nus salvarà la Cjargne?

2008-11-17T22:53:00.007+01:00

Des mês bandis no si rive a cjapâ ma graziis a internet o soi rivât a viodi lis trasmissions furlanis di VideoTeleCarnia.

Che o savedi jo, lis televisions che a fasìn ogni tant alc par furlan a son Telefriuli, la Rai regjonâl e ultimementri, cussì mi àn dite, ancje Telepordenon.

Chei di VTC a son però i prins a meti i filmâts a disposizion su la rêt, une robe une vore mertorie. Bisugnarès che altris i ledin daûr.

San Simon cence tecnologjie.

2008-11-06T23:43:00.003+01:00

Il premi leterari San Simon di Codroip di chest an nol è stât assegnât.

La zurie e veve dentri i scritôrs Franca Mainardis, Mario Turello, Carlo Tolazzi, Aldo Colonnello e Giacomo Vit.

Fra lis cinc oparis presentadis no a crodût che al sedi il câs di dâ il premi a nissun, e e à dome segnalât la racuelte “Contis di un di Torse” di Paolo Monte (che par chest e vignarà publicade).

Leint lis motivazions e lis declarazions fatis dai zurâts, ancje chest colp a vegnin stiçadis des riflessions su la salût de narative in lenghe furlane.

E dîs la Mainardis sul Messaggero dal 29 di Otubar che “lis contis a son cuasi simpri autobiografichis e nostalgjichementri riferidis a vicendis, ambientazions e contescj za sintûts e par nuie origjinâi. Debile e je la forme cun frasis che çuetin, cuntun doprâ spropositât dai averbis, par altri pôc doprâts tal furlan comun (come scjassosementri). La grafie no je curade, di spes vignude fûr doprant il coretôr ortografic. La impression e je che in cualchi câs e sedi stade adiriture dome une traduzion dal talian al furlan”.

La Mainardis si domande ancje se il dovê presentâ des oparis di almancul 90 pagjinis nol sedi masse e se no si vedi di sbassâ il tîr.

Di dut il discors mi ingolosìs un grum chel dal coretôr ortografic. Mi visi di tropis voltis che mi soi inrabiât cu la machine che mi cambiave lis peraulis ancje se no volevi (o pensi a Word) o che in continuazion e cîr di imboconâmi cemût finîle la peraule (come che al fâs il OpenOffice che o dopri cumò).

Par altri mi ven ancje di disi puar coretôr, che di bessôl al comede la lenghe cence savê nuie di robis, ambients e contescj za sintûts, nol à migo che di fâ mal a nissun lui!

Forsit pal futûr o podin ancje inmagjinâsi une machine che e scrivedi par furlan cence la man dal om.

Un furlan che al sorevîf cence i furlans.

Un an!

2008-10-31T22:25:00.004+01:00

Propit in chei dîs ca o fâs un an tant che blogarin.

Cuant che o vevi tacât o jeri daûr a mangjâ cjastinis bevint ribuele e chel timp al è (za) tornât.

Chê volte o vevi scrit: "No promet nie, il blog al è gno e se mi stufi no lu inzornarai masse spes, ma intant lu tachi."

E alore o rinovi la promesse. Un prindis pal crot!
Viva!

Il mestri unic.

2008-10-20T23:16:00.003+02:00

La robe plui sureâl dai politics che a vegnin a propagandâ la bontât dal mestri unic, che a son daûr a tornâ a meti in vore, a son i ricuarts dai lôr di mestris, ducj bogns e brâfs!

Parfin a la ministre, (che no je che vedi 70 agns), i à telefonât in direte televisive la sô di mestre. A someave di lei une pagjine di libri dal '800, cun tante di che mêl che ancje al De Amicis i sarès vignût il diabete!

Dut câs il mestri unic plui famôs nassût intal stivâl lu vin vût nô a Tumieç (se no mi confont te frazion di Cjanive), fra il 1906 e il 1907.

A chei timps al jere facil che i mestris a vignissin di lontan par insegnânus ben il talian. Il non di chel mestri famôs al jere Benito Mussolini.

I jere tocjade une seconde elementâr cuntune cuarantine di canais e, se si vâ a viodi i documents de epoche, nol è che al vedi fat propite une grande figure.

Intal stes periodi Hitler al jeri a Viene che al cirive, cence rivâ, di jentrâ inte Academie des Bielis Arts.

I doi amigos a saran dai bogns mestris par masse int di li a cualchi an.

Mestris unics naturalmentri.

Pordenon al lei

2008-09-23T15:34:00.010+02:00

Fra Vendeme, Friuli Doc e Pordenon che al lei no si pues dî che nol sedi stât nuie ce fâ cheste setemane. Le vendeme e ven cuant che e ven (o contarai alc plui indenant...) ma isal pussibil che no sedin bogns di metisi dacuardi par fâ la manifestazion di Udin e chê di Pordenon in dôs setemanis difarentis!

O forsit la idee par l'an che al ven e je chê di fâ ancje alc a Gurize e a Tumieç tai stes dîs, dut in contemporanie!
Cussì i altris fin setemane di Setembar ducj a saran libars di lâ atôr pai centris comerciâi!

Di Pordenon che al lei a àn za contât ben altris blogarins, jo o tachi dome une foto dai Molino Rosenkranz che a àn lavorât in dutis e dôs lis fiestis (bulos!) e une poesie di Tavan che o dedichi a ducj chei che a son lontans de lôr Andreis...

Andrèes

Un troi
cjases
arbi
montz
a sèmea 'na conta.
Inveze,
omi
femenes
ostarìes

Gnogno Doc

2008-09-20T00:45:00.006+02:00

Îr no mi ise tocjade di puartâ il frut plui grant, chel di cinc agns, là de sede de filologjiche furlane!

Al veve viodût sul program di Friûl Doc che e jere la inaugurazion de mostre dai gnognosaurs, la sô passion dal moment, e alore jo e la femine o vin scugnût puartâlu a cognossi l'autôr.

Cuant che o sin rivâts e o vin viodût rivâ ducj i "caporions" de filologjiche o vin capît che chê dai gnognos no jere propite la robe principâl de serade ma o si sin fermâts istès a scoltâ la conference su la presentazion di un libri su lis oparis di art de associazion.

In curt o vin capît che il frut a si sarès stufât e cuant che il president de filologjiche al à tacât a alternâ tal sô discors talian e furlan, daur tradizion filologjiche :-) , e il piçul al à tacât a corezilu cun frasis come: "papà, il siôr al à dite ma però, no si dîs ma però!", o vin pensât che al jere miôr puartâlu fûr a mangjâ une fritule.

Tornâts cuant che dut al jere finît o vin finalmentri podût contentâlu come che si viôt te foto; un graziis di cûr al Dree pe cortesie.

Zero in tolerance

2008-09-11T23:48:00.004+02:00

Cumò che il bum bum mediatic a si è spostât sul concet di esubar (la miôr batude su la cuestion e je chê di Altan che al dîs che in Italie a son 40 milions di esubars…) o ai voie di fevelâ su un dai slogans di mode intai ultins mês, ven a stâti chel de tolerance zero.

Il concet al è nassût cuintri i clandestins ma po dopo la idee si è slargjade. E alore tolerance zero cuintri i rom, cuintri i tifôs di balon violents, cuintri i laris e i spaçadôrs (se forescj, mi racomandi), cuintri i mussats e cuintri lis budiesis.
(No piert masse timp a contâ che il mussat tigri al è un imigrât clandestin che al veve di stâ a becâ la int a cjase sô invezit di vignî a puartâ vie il lavôr ai mussats nostrans).

Se o fos un predi o varès di sigûr tantis robis ce dî su la peraule tolerance, magari leade al concet di ce che al è diviers di nô (probabilmentri nome tolerâ il forest al è masse pôc…).
Ma al è miôr se jo o fâs il gno mistîr e alore o fevelarai un pôc de seconde peraule ven a stâi dal zero.

Il zero, tant che numar, al è un concet che ca di noaltris nol è simpri esistût. I romans no lu vevin, anzit i prins vêrs studis su di lui a son stâts fats in Indie cuant che ca di nô a jerin i Langobarts.
Il numar al è stât un sîs cent agns par vignî in Europe e al è rivât graziis ai araps.

Pe nestre civiltât al è stât impuartanton, cun lui a si son podûts scrivi i numars cul sisteme posizionâl (chel che o doprin vuê) e a si son podûts inventâ des manieris par fâ i conts une vore plui pratichis di chês di prime.

Ma nol baste, parcè che cul zero a si son podûts pensâ dute une serie di concets une vore sofisticâts. Il zero nol è simpri avuâl a nuie…, pensin ai numars negatîfs, a la temperadure cuant che la aghe si glace, ma ancje, restant ae temperadure, al zero assolût.

E dopo a son i calcui cul zero: se somant o gjavant zero a un numar no lu fasin gambiâ (si dîs che il zero al è neutri pe some e pe sotrazion), lis robis a gambiin moltiplicant e dividint par zero.
Se un numar moltiplicât par zero al fâs zero (che nol è mâl come risultât), il biel si à cuant che si divît un numar par zero, ca vie il risultât al pues no vê significât o, daur de suaze concetuâl dulà che o si cjatin, vêlu, e magari tocjâ il concet di infinît (calcolant il limit).

In sumis il concet di tolerance zero nol è par nuie banâl!

O dubiti che ducj i avocats che o vin in parlament e che nus comandin a vedin mai imagjinât dute cheste complessitât ma su une robe a saran dacuardi: cence i musulmans nô no varessin elaborât il concet di zero e alore disin ancje che se no fossin esistûts i forescj nô no varessin la tolerance zero!

- Balon -

2008-09-03T12:17:00.003+02:00

O sai benissim che al è dut fint, aromai dut studiât dome par jessi mandât pe television, cui zuiadôrs mercenariis deventâts modei di vite e di pensîr, cu la int tignude cuiete par no pensâ ai veris problemis, cui arbitris comprâts e vendûts, cul doping e cun cuissà ce altri ancjemò. Ma cuant che o ai viodût chê bale rivâ lizere di metât cjamp e Di Natale che le cjarece dôs voltis cul pît, la prime par cuietâle e la seconde par mandâle a balonet al di là dal difensôr e dal puartîr, (puars cocâi!), ben o ai tacât a saltâ e a vuacâ come un frut.

Se tu i pensis parsore dopo tu viodis che a 'nd è pocje di razionalitât, ma ce puedie jessi di razionâl intune robe che si fâs cui pîts?

Dal balon mi vegnin iniment altri robis; de bale di cjarte che o dopravin par zuiâ tai curidôrs a scuele a lis voltis che o ai rot i ocjâi zuiant cuntune plui dure.

Mi ricuardi di chê volte che mi àn puartât a viodi Zico alenâsi a bati lis punizions al Moretti. Prin tîr, tal siet, secont tîr, tal siet, tierç tîr, tal siet di chê altre bande; al jere come viodi la publicitât di Ronaldhino, ma dal vêr, cence efiets speciâi.

E mi visi di cuant che e jê finide la partide cul Ajax, ducj in pîts a bati lis mans, nissun che al voledi la vie…

No, di razionalitât no 'nd è. Forsit par chest a contâlu il balon a son stâts in tancj:

Par fâ dome cualchi non, i prins che mi vegnin iniment, o met lis contis di Futbol di Osvaldo Soriano, o la Febbre a 90° di Nick Horby (al è famôs ancje il film che a an tirât fûr dal libri), vignint plui dongje mi ricuardi lis fotos in blanc e neri di Pasolini che al zuie (o ai metût ancje un video in une lenghe no masse foreste, provait a viodi trop che si capìs) o l'episodi di Pidin D Citadin V intal Donald dal Tiliment di Stiefin Morat (par contâ l'anime anarchiche che o vin, no ducj e no simpri sants e lavoradôrs!).

La miôr batude sul balon che o cognòs e je par Triestin, la diseve il famôs alenadôr Nereo Rocco cuant che, prime di tacà la partide, il coleghe aversari i dave la man augurantsi che al vincedi chel plui brâf: "Speremo de no" e jere la rispueste.

Disgrafiis 2 - cuâl isal il furlan plui biel?

2008-08-27T23:57:00.004+02:00

Continuant il discors che o vevi tacât timp indaûr su la grafie o fevelarai vuê de lenghe di doprâ cuant che si scrîf.

Prime di rivâ a la coinè (peraule che a cualchidun i fâs vignî il mâl di panze dome a sintîle) al è ben fâsi une domande: cuâl isal il furlan vêr, cuâl isal il furlan plui biel?

La rispueste classiche e varès di jessi, lant daûr de tradizion, chel di Sant Danêl, ma, almancul che un nol sedi di Sant Danêl, la rispueste e je sbaliade! Il furlan plui biel al è chel che un al à imparât in famee, il furlan de mari, chel che un al fevele di frutin piçul.

Daûr i neurolinguiscj cheste no je une cuestion di gust personâl ma si trate di schemis mentâi che si vegnin a formâ tai neurons dal çurviel intai agns dal so plui grant svilup e che a restaran par simpri, par che al è normâl che la lenghe dal cûr e sedi la variant locâl de marilenghe che si è imparade.

Par chest l'istint che un al à cuant che al tache a scrivi al è chel di doprâ il so furlan.

Se la robe e va di sigûr ben pe poesie, se e pues lâ ben pe prose, pal teatri e magari par il propit blog (un esempli che mi ven iniment al è il curtissâr), il probleme di vê une lenghe comune par scrivi al ven fûr cuant che si cjacare di alc in gjenerâl, di alc par ducj (un gjornâl, de sagjistiche, un comunicât pe stampe).

Chel che o ai fat jo cuant che o ai tacât a scrivi al è stât di cirî di doprâ il furlan comun moderni, la moderne coinè.

Tancj (?!) di lôr la critichin parcè che a disin che al è un furlan inventât dai professôrs, masse dongje al talian, parât ju dal alt de regjon o di chel tristat di Lamuela (e dopo a tachin cuntune naine sui bêçs straçâts, sul fat che al cope lis varietâts e vie indenant, dut scrit ben par talian).

A mi il gnûf furlan mi plâs une vore di plui di chel di une volte…
Al è plui dongje a chel che o feveli jo ancje se sigurementri plui imbastardît.

O ai ancje di disi che jo o soi un câs un pôc particolâr parcè che in famee, di bande di mê mari e di me pari o ai imparât doi furlans difarents, (di une bande chel di Tarcint, di chê altre chel di Codroip). Po dopo i miei paîs (Cividât, Orsarie, Buri), a àn ducj une variant difarente e insome une lenghe comune tal scrit e vûl.

Atenzion però! Dome tal scrit!

Parcè che la robe che mancul si sa e che no si conte mai avonde, il segret che nissun al disvele, (e massime no lu cognossin chei che a tramain cuintri il furlan), al è che no esist une regole di pronuncie dal furlan comun, ven a stâi che nol esist un furlan fevelât comun e che si à di leilu come se al fos il propit furlan.

Se o scrîf dîs ûfs; a Codroip lu lei deis ous e invezit a Buri dîs ûs. Se o scrîf salam di cjase; a Tarcint o lei salamp di cjase e a Orsarie salamp di cjasa, e o soi simpri tal just!

Gnove blogarine

2008-08-27T23:38:00.004+02:00

O segnali un gnûf blog furlan: Scuele furlane de mestre Lorele la Morete. Lait a viodilu.

Mostro di un lôf.

2008-08-23T14:47:00.003+02:00

Vuê o fâs jo come il brâf furlan e o conti un dôs robis sul spetacul di îr di sere dal Teatrin dal Rifo a Sant Zorç di Noiâr.

O ai puartât a viodilu ancje il me fi plui grant parcè che si tratave de dopleadure dal vîf di un pôcs di cjartons animâts di Berto Lôf. A viodilu a saran stâts almancul un cent e cincuante di lôr, cussì che a àn scugnût zontâ un pocis di cjadreis: int di dutis lis etâts, zovins e vecjuts, di chei che son lâts fûr cun chê di là a cjapâ un pôc di fresc ai plui piçui che di solit a chê ore a son za a durmî e che a si son gjoldûts un grum il spetacul, (ancje chei che cui nonos a fevelavin par talian).

La traduzion dai tescj e jere di Paoli Patui e prin di scomençâ e je stade lete une sô curte ma biele presentazion cun cualchi riflession su la disfide che e je il tradusi e su la elasticitât che lis lenghis veris a mostrin cuant che passant di une a chê altre si àn di lâ a cirî lis peraulis justis par tignî il significât vêr al di là de traduzion leterâl.

Po dopo al è partît il prin episodi che al è stât mandât prime par talian e dopo dopleât dai atôrs par furlan fasint capî la dificoltât, la bravure e disin ancje la professionalitât che e je daûr.
Si è lâts indenant cun altri cuatri, cinc episodis e, intant che i fruts (e i grancj) a ridevin o ai amirât il biel mistîr che al è daûr ae bravure dai atôrs.

Viodude la dificoltât a cjatâ robe par furlan par fruts al sarès biel che il materiâl metût adun o produsût de Rai al fos metût a disposizion su Internet e che al fos pussibil comprâ i DVD.

Disgrafiis 1 – il stîl gnûf de grafie furlane

2008-07-29T23:15:00.005+02:00

Cuant che un al tache a scrivi par furlan, prime di rivâ a la cuestion plui impuartante (ven a stâi ce robe scrivi), si cjate denant une serie di problemis “tecnics”: ce grafie doprâ e in ce lenghe (ce varietât) scrivi.

Za il capî che a son dôs robis di frontâ difarentis fra di lôr al è un ostacul no di pôc, cumò o dîs la me contant ce che o ai fat jo.

Prin di dut o disarai che fra scuele, universitât e lavôr o ai vût scrit e let tant par talian e, di sigûr mancul ben, ancje in cualchi altre lenghe, soredut par inglês. Par furlan scuasit nuie, ancje parcè che al jere dificil cjatâ alc di scrit e chel che si cjatave al jere dut masse “folcloristic”: lis tradizions di une volte, i lavôrs di une volte, i zûcs di une volte, e ce pâr di balis di une volte…

(E si che te musiche o tal teatri robis plui modernis si viodevin... O ai di dîsi che cumò che o ai imparât a cirî o rivi a cjatâ alc di lei che mi interessedi)

Un biel dî mi soi impensât che, viodût che lu fevelavi, e jere ore di imparâ a scrivilu il furlan, in fin dai conts inte vite o ai vût di imparâ tantis robis ben plui dificilis…

Cussì o ai tacât. O ai tirât fûr cualchi librut o ai scomençât a scrivi regolarmentri e a lei dut chel che o cjatavi atôr (e Internet alc al jude).

O ai imparât a doprâ il gnûf stîl de grafie, chê che e ven clamade, cuntune peraule une vore brutone, grafie standard.

Di grafiis minôrs atôr a 'nd è une vore, tant che e je stade (e in part e je ancjemò) une vere vuere des piputis fra i partesans des diviersis grafiis, cun tancj di lôr che si son ruvinâts un grum di gnots pal gnervôs par ce che cualchidun altri i diseve che si veve di scrivi duč invezit di duc' o invezit di ducj, lassânt stâ i duciu o ducju o saio jo ce altri.

Jo o scrîf ducj (su cemût che lu lei o disarai inte seconde pontade…) ma chest e je nome une cuestion tecniche, se cualchidun al scrîf intune altre maniere lu lei istès, nissun boicotaç e nissune pretese di superioritât. Take it easy. No stin a bacilai masse.

Nol è che dutis lis convenzions de gnove grafie mi plasedin (no sai, par esempli mi plasarès scrivi salamp di San Martin invezit di salam di Sant Martin), ma ancje chês altris grafiis che o viôt atôr e an robis che no mi plasin. Dut câs o ai un sisteme e des regulis par scrivi.

Une alternative e sarès; inventâ jo une gnove grafie e tacâ la mê vuere des piputis, magari cun cualchi biele letare (par talian) sui gjornâi…

Cungjò

2008-07-25T23:04:00.003+02:00

Son aromai scuasit cuindis dîs che Pierluigi Visintin nol è plui.

Jo lu vevi cognossût par vie des presentazions de version furlane de Odissee che al à scrit cun Sandri Carrozzo. Mi ricuardi che mi veve spiegât la sô teorie che la Odissee al jere un libri progressist e invezit la Iliade al jere conservadôr parcè che e mostrave une vision dal mont reazionarie.

Par sigûr il bon vin che o vin bevût al judave ben a profondî chestis tematichis e ancje altris a dî il vêr…

Un articul su la sô vite e sui cetancj interès che al veve si cjate sul ultin numar dal Diari.

Chi fieneggia sull’alpe?

2008-07-21T23:10:00.006+02:00

"E poi chi fieneggia sull'alpe?" cheste e je la famose batude fate di un baron de universitât di Triest intai agns '60 par spiegâ la no convenience di vierzi une universitât a Udin. Cumò che si torne a cjacarâ di un sôl ateneu in regjon mi somee just ricuardâ chês peraulis.

Viodude l'ande al è probabil che di ca in curt o tacarin a lei sui gjornâi des conseguencis negativis dal abandon de mont, dal fat che no fasint plui lens come une volte i boscs a stan deventant salvadis, dal risi simpri plui grant di franis e incendis, par no fevelâ des invasions des cavaletis e saio jo di ce altri...

Inzortaments

2008-07-09T23:11:00.003+02:00

Intai ultins timps no ai traficât masse cun Internet, vuê o ai voie di segnalâ cualchidune des novitâts furlanis vignudis fûr ultimamentri tal câs che cualchidun no lis vedi viodudis.

Janez al à metût sul so blog un dizionari sloven-furlan che si pues discjamâ, mi somee un lavoron fat une vore ben, di ce che o sai jo fin cumò al jere a disposizion dome il multilengâl di Nazzi e il dizionari di Marjian Brecelj ma se no sbagli, chel di Janez al è il prin in grafie standard.

Al continue invezit a là indenant il blog di Storie Furlane di Sandri Carozzo.

Al à tacât a scrivi Il guardianut, un gnûf blogarin di Romans che cumò al somearès spierdût su pe Cechie, sperin ben!

Scjalis: imni a la vite

2008-06-13T10:35:00.005+02:00

La vite e je plene di personis normâls che, sburtadis dal destin, a fasin robis straordenaris. Ogni tant mi vegnin i sgrisui pensant a trope fature, trop amôr, trop coragjo e tropis lagrimis che a son daûr a tante int. Vuê o posti un articul di pre Vigji Glovaz vignût fûr su la Vite Catoliche di stemane stade.

Lu fâs cuntun abraç a la Pati, a Massimo e ai doi lôr tesauruts: l'Olm di mont (che al à ancjemò di imparâ a là su pai cjariesârs!) e Sami.

La voie di vivi di Samuêl
di pre Vigji Glovaz

Sui doi agns i gjenitôrs a scomençarin a visâsi che Samuêl nol rivave a feveluçâ. Cul lâ dal timp il dubi si mudâ in ciertece e a tacarin a domandâsi ce fâ. Al cjaminave come ducj i frutins dal borc, al smalitave lis manutis cence polse, al cjalave cun doi vôi pinelâts di otubar, al sintive e al capive tant che pôcs de sô etât, al lassave che i pinsîrs i coressin a brene lavade pal cjâf, ma lis peraulis nol rivave a disniçâlis.
“Ce aial il frut?”, i domandarin i gjenitôrs ai miedis. E une rie di specialiscj i diagnosticarin: “Mancjave di mieline tai filaments che, partint dal çurviel, a puartin i comants par dut il cuarp e te centraline de fevele!”.
“No sintarin mai la vôs di Samuêl!”, a concluderin avilîts la sô mame, il papà e i nonos.
Prin che al les a scuele, però, Samuêl si cjatâ in cjase il plui biel regâl di chest mont: un fradi, fuart tant che l'olm di mont.
Al tacà la scuele a Faedis che, jessint piçule, a garantìs un sostegn seguitîf e familiâr. Samuêl, vuê, al à cutuardis agns e al è in tierce medie. Dutis lis buinoris, al monte su la machine de mame, al rive te scuele e al si met te companie, come ducj i fantacins.
Al scolte, al marche, al capìs, al fâs di cont e al resone, al cjamine e al gjolt, al rît e al vai come ducj, ma nol rive a fevelâ. Cun dut a chel al à une cjalade inteligjente e une intuizion fine che pôcs i stan a pâr.
Chê altre dì, te ore di talian, il professôr Mauro al à dât il compit a dute la classe: “Ce ti plasaressial vê di chei altris - chei di cjase, amîs, insegnants, … - che tu crodis di no vê o no vê avonde?”
O volti la sô rispueste peraule par peraule, par che no vedis di pensâ che o inventi di cjâf gno.

“Sì, o ai la combinazion di dius ce che voaltris o vês e che no savês di vêlu! Ven a stâi un cuarp che al fâs lis robis che i comande il çurviel: dôs mans che a disvidin un tapon cuant che o vês sêt o che a vierzin une puarte cuant che o sês stufs; dôs gjambis che a corin e a pedalin par lâ a cjatâ un amì, un amì par contâi tantis robis e po stâ a scoltâlu a pene finîts i compits. Tornâ a cjase e preparâ un panìn a gno fradi e domandâi a gno pari cemût che e va.
O bramarès vê di voaltris comprension e no compassion che o vedis di capî che jo no rivi, ma o pues, che o soi presint, ancje se o semei lontan. Mi volês ducj ben e us ai agrât, ma o volarès ancje sei durion, tirâsi pai dincj, contindi, fâ cualchi dispiet e burle.
Magari cussì no o ai capît che dâ ce che si sa di vê al è impussibil, ma jo o fasarai di dut par cjapâus come che e sês!”.

Devant di meracui come chescj une volte Gjesù al disè: “Ti benedìs, Pari, Signôr dal cîl e de tiere, che tu âs tignudis platadis chestis robis ai savints e ai inteligjents e tu ur es âs palesadis ai sempliçs. Sì, Pari, parcè che cussì ti a plasût a ti” (Mt 11,25-26).
Nissun miôr dal Vanzeli par pandi lis cjaladis altis di Diu, dai sempliçs e di Samuêl.
Dome cui che nol po gjoldi di ce che nus semee un dirit e une normalitât al fâs cressi la sensibilitât e la osservazion su lis robis di nuie de vite e la bielece dai afiets, tai rapuarts.
Se ducj o crodìn che Samuêl nol vedi peraulis, no je vere! Lui stes al è peraule: cu la sô finece, la sô voie di vivi, cui so dînus cetant biele che e je la vite e di gjoldile cun agrât.

Dree e il non de sunete.

2008-06-10T23:56:00.004+02:00

Par me al è un periodi un pôc incasinât e o rivi nome vuê a fâ un coment pe lungje polse che si è cjapât Il Furlanist, il prin e il plui impuartant dai blogs furlans.

O vevi pensât di fa un post intal spirit plui vêr dal blog di Dree e par chel o vevi tacât a scrivi la liste di dutis lis difarentis manieris di disi frice par furlan, cussì juste par fa un apendice al Pirona.

Par tirâ su il nivel dal articul o varès zontât che al è un omaç a Benigni e al so famôs toc teatrâl sui sinonims talians e o pensavi ancje di tirâ fûr cualchi coment di Pasolin su la sô trilogjie de vite.

Po ben cuant che o soi pront par tacâ a scrivi e o ai denant di me la liste o pensi di provâ a cirî su Internet se o cjati cualchi altri sinonim. O tachi google e … nol vegnial fûr che il gno articul lu à za scrit chel can dal osti di Christian un pâr di agns indaûr, cun tant di contribût di chel che al sarès deventât il gnûf president de regjon. Biel no?

Potence de rêt.

Dree, dut chest ambaradan tu lu âs tacât tu!

Buine polse.

Omonimie

2008-05-15T22:18:00.003+02:00

Cuant che o ai tacât il gno blog o ai contât de pôre che cualchidun al à che i crots a stedin disparint de nestre tiere. Par chel o ai cjapât il non di crot e a dì il vêr o pensavi di jessi il sôl.

Ma bisugne simpri vê sperance.

Zirant atôr par Internet o ai cjatât adiriture une associazion “Crot varia umanità onlus” cun tant di “crotarinis”. A fasin une biele ativitât artistiche leade ae beneficence.
Nie ce disi, bravis e vonde. Dal rest o stin fevelant di crots.

O zuri - I zuri

2008-05-07T22:54:00.004+02:00

Îr si è insediât il gnûf consei regjonâl cul zurament dai conseîrs. Il zurament al va fat par talian, chei che a àn voie a puedin zontâ ancje la declarazion fate intune altre des lenghis ricognossudis inte nestre regjon, ven a stâi par furlan, par sloven o par todesc.

Stant che i simbui a son impuartants e che i politics a stan une vore atents che si feveledi ben di lôr o met l'elenc di chei che a àn doprât ancje lis nestris lenghis minoritariis:
a àn zurât par furlan Ugo De Mattia, Maurizio Franz, Enore Picco e Claudio Violino de Leghe, Roberto Molinaro dal Udc, Giorgio Baiutti, Franco Brussa, Franco Iacop, Anna Maria Menosso e Paolo Menis dal Pd, Giorgio Brandolin dal Pd al à zurât par furlan e par sloven, Igor Gabrovec de Slovenska Skupnost e Igor Kocijančič de Çampe Arc di San Marc, a àn zurât par sloven.

In dut in 13 su 58 conseîrs, cuntune rapresentance trasversâl dai diviers schiriaments ancje se al è di marcâ che nol à doprât il furlan nissun dal Pdl.

Par me almancul il president de regjon al podarès fâ il zurament doprant dutis e cuatri lis lenghis regionâls. Se mai al vignarà chel dì vignît a cirimi, o paiarai di bevi a ducj.

Ciment cence sintiment

2008-05-05T22:57:00.002+02:00

Ducj i trê cuatri paîs dulà che o soi stât a sta e che a son tal me cûr, a àn une lôr fieste, un perdon, une sagre. Nissune di lôr e je dut câs cussì grande e biele come la fieste dal vin di Buri.

Par mandâ indenant cheste setemane al è daûr il lavôr di tante int, tant volontariât e tant timp parcè che par cjapâ su al vûl semenât.

La fieste dal vin di Buri però, di cualchi an in ca, no je plui chê di une volte. Dut al è tacât cuant che, pensant di fa ben, si è fat sparî dut il lunc splaçon di glerie cuntun biel pôc di ciment.

Lis robis a son stadis fatis cun criteri, l'architet si è inzegnât di proviodi modons, piastrelis, scjalis e banchinis. Si è metût a norme la struture par fa la grilie, si è fat un biel troi par cjaminâ lunc il Riul.

Cuant che cumò tu rivis a la fieste no son plui i barachins di une volte ma dome dai grancj tendons.

Tant ciment ma pôc sintiment.

Cu la forcje di trê

2008-04-21T22:46:00.004+02:00

Vuê sot sere, passant dongje dal me fi plui grant, dut impegnât come simpri a zuiâ cu lis costruzions, lu ai sintût che al cjantuçave:

"anin a spandi ledan
cu la forcje di trê
o fasin la curve
si ribalte il cjaruç
o cjapin su il ledan
cu la forcje di trê…"

"Piçul, cui ti aial insegnât cheste cjançon?" i ai subit domandât.
"A son stadis lis mestris tal asilo" mi à rispuindût.
Viôt ce sacranon di mestris, o ai pensât ridint.

La plui biele version che mi visi di vê sintude di cheste filastrocje e je stade chê hard-rock fate intun conciert, mi pâr tal auditorium Zanon, intune manifestazion studentescje. Al sarâ stât plui o mancul un milion di agns fa, cuant che di sigûr al jere ancjemò su il mûr di Berlin e i Mitili si e no che vevin tacât a sunâ.

Oms e suriis

2008-04-16T17:21:00.004+02:00

Ae fin sino dal gjat o come simpri la cuestion e jere dome chê di sielzi cuâl fra i gjatats?

Pe situazion nazionâl o viodarìn cemût che va. Tai ultins cuindis agns a son stâts ducj plui bogns a fâ la oposizion che a mandâ indevant lis robis cuant che al è tocjât a lôr.

Ma cemût laraie cu la cuestion furlane? La sielte dal Pdl di lassâle dute in man ae Leghe cjapant une posizion “nazionaliste” mi somee un ninin masse di diestre par un partît che al ves voie di jessi “popolâr”, pussibil che inte ex FI nol sedi nissun che al tignedi al furlan?

La situazion e somee difarente di chê des altris bandis dal nord Italie parcè che ca vie e pâr jessi une fuarte component cuintri la difese des resons locâls (e dal Friûl).

“Cumò, tant che 15 agns fa, si torne a sperâ inte lega nord. Cul handicap che tancj in grât di alçâ la vôs a nestri pro, no son plui” si lamente DS sul furlanist.

Sperin ben, par intant si sint dome sgnaulâ.

--------------------------------

(...) The best laid schemes o' mice an' men
Gang aft a-gley,
An' lea'e us nought but grief an' pain,
For promised joy.

(...) I ben progjetâts plans des suriis e dai oms
Spes a van di mâl
E no nus lassin nuie altri che aflizion e dolôr
Pe felicitât sperade

Robert Burns (da “To a Mouse” scrit in scozês intal 1785, di cheste poesie e à cjapât il titul "Of Mice and Men" di John Steinbeck)

Santuts eletorâi

2008-04-09T22:50:00.004+02:00

Cuant che o voi in machine o scolti simpri la radio. A dî il vêr no ai un canâl preferît, des voltis mi plâs sintî musiche, (ma il probleme al è che la musiche pe radio e je dute compagne), des voltis mi plâs sintî tabaiâ.

Il miercus o scomenci vore plui tart e lant su o sint di solit "scartòs", la rassegne stampe di onde furlane che in chest periodi e finìs cuntune serie di santuts radiofonics dai diviers candidâts.

Di solit, a pene che tacavin, o ziravi canâl ma di cualchi miercus in ca o ai cjapât la usance di scoltâju.

In prin a jerin scuasit ducj par talian e tancj cuntun marcât acent di altris regjons. Mi soi simpri domandât cuâl scoltadôr di onde furlane (ma ancje di une altre radio) a pensavin di rivâ a cunvinci cui messaçs fats in che maniere, probabilmentri no jerin santuts pensâts pe onde furlane e tancj di lôr no jerin nancje pensâts pal Friûl.

Vuê i santuts a jerin ducj par furlan!

Bon, se di une bande si pues stâ contents che la lenghe e vignedi doprade dai candidâts di (cuasi) ducj i partîts di che altre mi ven di pensâ che, tratant di cjapâ un vôt in plui, a son bogns di fâ e di disi cualsisei robe in cualsisei lenghe!

Il salt dal crot. O dîs ancje che il candidât cjargnel al podeve almancul fâ finte di disi alc par furlan ancje se i fâs mal di panze. Bolpon o farc? Viodarìn.

Intal mont ideâl

2008-04-01T22:38:00.004+02:00

Se o gjavin lis fuarcis talianotis plui nazionalistis la tutele dal furlan, intindude come difese di une minorance di protezi (a çampe) o ben come afermazion di libertât (a diestre), e varès di jessi une cuestion facilmentri condivisibile sei dai politics progressiscj che di chei conservadôrs.

Cheste aspirazion libertarie e di avualiance no varès di fâ fature a jentrâ tai ideai di fonde dai diviers partîts talians, almancul inte lôr personificazion regjonâl.

Dut chest intal mont ideâl, la realtât e je plui grivie.

Cuant che al va ben al somee che pai politicants la difese dal furlan e sedi dome un mieç strumentâl par cjapâ i vôts furlaniscj e no alc di verementri sintût, cuant che al va mâl al devente robe di dineâ e di scombati.

Prest si torne a votâ, cui difindaraie i nestris dirits?

Storiis

2008-03-27T23:14:00.002+01:00

In font a viâl Triest a Udin si rive in place Oberdan, passant par là mi è vignude voie di contâ dôs storiis di cent e passe agns indaûr.

La prime e je che di Wilhelm Oberdank cognossût in Italie come Guglielmo Oberdan, zovin nazionalist triestin che tal 1882 al veve cirût di copâ l'imperadôr Austriac in visite a Triest. L'atentât al falì e il zovin atentadôr al fo condanât a muart e picjât.

Al è considerât un dai grancj martars dal patriotisim talian, su di lui a son stadis fatis poesiis, cjançons, placis e scuelis.

La seconde storie e je che dal republican Giovanni Passannante nassût a Salvia di Lucania tal 1849. Cuant che il re talian Umberto I al visità Napoli intal 1878 lui al à cirì di curtissâlu. Cjapât e impresonât al fo torturât par fai confessâ i nons dai siei compliçs ancje se inte realtât al veve fat dut di bessôl.

Sô mari, di plui di setante agns, i siei fradis e lis sûrs a forin metûts in manicomi par il rest de lôr vite, il sô paîs al scugnì cambiâ di non e ancjemò vuê si clame Savoia di Lucania.

Passannante al fo condanât al ergastul. Al fo sierât incjadenât intune preson cence lûs e cence cagadôr, alte 1 metri e 40. Nissun i podeve fevelà. Dopo agns di preson, une volte deventât mat, al fo trasferît in manicomi. Muart tal 1910 i fo taiât il cjâf che al fo tignût in mostre al museu criminologjic de aministrazion penitenziarie dal 1936 al 2007 cuant che ae fin al fo soterât.

Dôs storiis di terorisim une vore tristis e malinconichis, dôs storiis talianis.

Il Friûl digjitâl di vuê: mangjant shusi suntun vulcan.

2008-03-14T22:20:00.003+01:00

Viodint il gnûf blog di archeologjie di archeofurlane mi e vignût iniment dai prins timps che o ai scomençât a traficâ cun internet, cuant che di robis furlanis inte rêt no tu 'nd cjatavis par nuie e anzit a dî il vêr lis robis bielis a jerin dome par inglês!

E jê vere che il Friûl digjitâl nol è masse grant nancje al dì di vuê però, se si à timp di cirî, si tache a cjatâ verementri di dut. Lassin stâ il mont blogarin che al è nassût dal furlanist e che al è simpri plui svari. Par cui che no lis à letis o segnali un dôs trê robutis cjatadis atôr.

Scomencin cuntun dizionariut japonês-talian-furlan su la lote e lis arts marziâls e une dispense talian-furlan pe difese personâl fate de Friûl Fight System.

Passin dopo a une piçule pagjinute cul manifest par furlan dal slow food: il sfuei di Parigji, e ae fin rivin al glossari di vulcanologjie in marilenghe sul sît svuizar stromboli on-line.

Come che al notarès ben Janez cualchi volte la grafie e je strambe e malsigure ma ae fin al somearès scuasit che pai furlans il furlan al sedi une lenghe che si podedi doprâ par fevelâ (e par scrivi) di cualsisei robe.

Codroip digjitâl

2008-03-06T22:14:00.002+01:00

Al è vignût fûr il gnûf bant di concors dal tradizionâl premi leterari pe narative furlane “San Simon” di Codroip. Lis oparis a saran di fâ rivâ ae biblioteche di Codroip dentri il 1 di Setembar. Inte Jurie a saran fra i altris Aldo Colonello, Franca Mainardis, Carlo Tolazzi, Mario Turello e Giacomo Vit.

Une novitât interessante di chest an e sarà la pussibilitât di publicâ in formât eletronic i libris des oparis segnaladis e di chês che no varan vinçût sul sît internet da la biblioteche.

Ben fate! Nancje che vedin let il sugjeriment che il vuestri crot al veve fat timp indaûr.

La leç de mont

2008-02-23T23:28:00.003+01:00

Vê lis montagnis tal sfont de visuâl al fâs part dal gno orizont mentâl, par cuasi dute la mê vite al è stât cussì tant e je vere che chês voltis che, atôr pes planis dal marimont, no soi rivât a viodilis in lontanance, o ai vût la vere sensazion di jessi intun lûc forest.

Lis monts a son là, no si movin. Cualchidune e je come se e fos di famee, cuant che par esempli si viôt che al è neveât sul Mataiûr e jê une robe di contâ, di fâ savê e mi visi ben di mê none che e veve simpri iniment la sô mont; la Bernadie. Al è alc che al è simpri presint, a somein cuasi des divinitâts che e son li, di simpri, di gjenerazion in gjenerazion, a protezinus.

Ma lis lôr leçs, vuatis e teribilis, no perdonin cui che al sbalie. I ultins a rondolâ ju a son stâts doi morôs, Antonio e Luana, copâts pôcs dîs fâ intes lôr cjaris monts.

A sorevivi, ancjemò par un pôc, o restin nô, cui voi aromai suts, e sul sfont lôr, lis montagnis.

Nazionalisim furlan?

2008-02-17T23:35:00.003+01:00

La plui part dai articui di stampe cuintri la tutele de lenghe furlane vignûts fûr tal ultin an, stiçâts dal dibatit su la gnove leç sul furlan, nol è che meretave di jessi lete. Par caritât al è simpri just lei e al è ben che cualchidun al savedi ben rispuindi, ma par solit, il nivel inteletuâl des argomentazions al jere cussì bas che, gjavant il gnervôs, al vignive voie di lassâ pierdi e vonde.

Sul articul di Paolo Rumiz sul Messaggero di Sabide stade o ai invezit voie di disi alc se no altri parcè che Rumiz lu lei vulintîr e mi visi i siei reportage su la tragjedie jugoslave e lis contis sui soi viaçs atôr pe Europe une volte in biciclete, une altre cu la topolino e magari la volte dopo in tren.

Cheste volte no soi dacuardi cun cuasi nissune des tesis sostignudis tal articul. Anzit plui di cualchi argoment mi somee avonde debul. Su une cuestion o ai dut câs voie di fermâmi, ven a stâi cuant che, ae fin dal articul, al paragone la difese de lenghe furlane al soflâ sul nazionalisim fat di Miloseviç ae fin dai agns '80.

A dî il vêr no je la prime volte che Rumiz al evoche i Balcans fevelant dal Friûl. Mi visi che intun dai soi reportage di viaç, passant des nestris bandis e viodint ce tantis insegnis di buteghis e di fabrichis a vevin la peraule Friuli tal non, al scriveve che chest al jere un segn de influence dal nazionalisim balcanic des etniis che al rivave ancje in Italie.

Inte realtât la storie dai moviments autonomiscj furlans e je aromai avonde lungje e varie, ma se e je une robe che si pues disi su di lôr e je che no àn mai vût carateristichis violentis, la violence no je mai stade ni teorizade ni pensade. La lote pal furlan e je nome une domande di ricognossiment di dirits e cheste e je une bataie di civiltât puartade indenant in mût pacific te convinzion che cuant che si rivarà a bon fin si varâ fat si il ben dal Friûl ma si varâ fat ancje cressi il nivel civîl de Italie.

Simiots e garofui

2008-02-14T22:17:00.005+01:00

Viodint i altris blogarins furlans, fûr che il Dreut ben incuadrât, mi somee che par Sant Valentin a sedin deventâts ducj bulos! Si cjate chel che nus ricuarde che “aromai la mode americane di bombons e de fieste dai inamorâts si slargje pardut, ma in Friûl Sant Valantin al è patron dai epiletics” a chel altri che justementri al dîs che “se jê lu sa ce lu disio a fâ. Se no lu sa o e je sorde, vuarbe e çompe, o pûr no vûl savê 'nt”.

Dutis veretâts ma jo personalmentri al è za di cualchi dì che o ai vût dai avertiments cun frasis ditis par câs come “passant doman o sin za ai 14, aromai l'unvier al è finît”, che mi sa tant che a son stadis ditis cun chê abilitât strategjiche tipiche des feminis cuant che a an pôre che il lôr simiot si dismenteedi come al solit di un aniversari.

Fat al è che o vevi progjetât diviersis alternativis, une miôr di che altre. O vevi pensât di passâ par Udin par là a cjoli lis clavutis a Borc Praclûs e di cjapâ su un biel macet di rosis di cjamp (la stagjon juste!) o, se no rivavi, almancul di fermâmi te buteghe des rosis a comprâ un pôcs di garofui.

Ma si sa che chel che al vinç intal om al è simpri il simiot e cuant che tornant a cjase mi soi visât di ce che o vevi di fâ e o ai viodût ce ore che jere rivade no mi è restât che fermâmi tal prin puest ancjemò viert e comprâ almancul une scjatute di bombons.

Je propite vere, cui cjocolatins no si sbalie mai.

Bisugnarès imparâ a disi grazie

2008-02-09T23:32:00.000+01:00

O sai che no si pues fevelâ par ducj ma un dai limits (e des fuarcis) di tancj furlans che o cognòs al è chel di sparagnâ su lis peraulis. Ogni tant o sin masse ruspis e cualchi volte al sarès di disi alc di plui, magari dome par fâ un compliment o un ringraziament cuant che al è meretât.

E je altre int e a son altris latitudinis dulà che nol è chest pericul e i compliments a rivin ancje masse bondants. Di sigûr no simpri il sparagnâ su lis peraulis e je une brute robe, anzit spes disi dome une peraule juste o ben dite al è miôr. Al è come disi alc che al pese di plui, che al à un valôr plui grant. Anzit al è estetichementri biel rivâ a disi lis robis cun pocjis peraulis justis.

Ma masse spes chestis peraulis dome lis pensin e no lis disin.

Sandri Carozzo, chel mat che cun Pierluigi Visintin al à voltât par furlan l'Odissee, al à metût in rêt la opare di Otmar Mainardis o Anonimo Friulano. Dutis robis fatis a gratis, nome par passion.

Par chest a Sandri jo o ai voie di disi grazie.

Neri inte fumate

2008-02-01T23:27:00.000+01:00

Vuê, intune fumate di chês, al è rivât a cjase mê un vendidôr ambulant. Un neri. Un dai tancj che a vegnin cu la lôr borse grande cirint di venditi cualchi stupidade, ce façolets di cjarte ce un deodorant pe machine o sajo jo ce altri.

Si sa ben che un che al fâs un mistîr cussì al lavore in neri e scuasit di sigûr al è un clandestin.

Chel di vuê al fevelave par furlan, e no dome al saveve dîti un mandi o cualchi peraule par rufianâti ma si viodeve lu capive e lu fevelave propite ben. Di cualchi bande lu varà ben imparât e si à di dîsi che puescj di lavôr a 'nd saressin ma nie permès di permanence par lui, e je la leç...

Malatiis di stagjon

2008-01-22T23:01:00.000+01:00

O soi a cjase malât, robis che capitin e al è miôr cuant che si stâ ben.

Però no scugni cjalâ ogni moment l'orloi e o pues tignî il telefonin distudât.

No dut il mâl al è cussì mâl.

Il reclam

2008-01-11T15:35:00.000+01:00

Fra il reclam che mi è rivât a cjase cheste setemane, te liste des buteghis che fasin il pan cjalt intune famose cjadene di supermarcjâts, o ai cjatât une piçule imprecision (cjale la foto). Magari cualchidun al podarès scrivi al Piccolo la prime letare di proteste juste dal àn cuintri chei sacramentâts di furlans.

No je plui la gubane di une volte

2008-01-05T23:16:00.001+01:00

Cul gnûf an, ducj ingubanâts cul mangjâ des fiestis e cun ancjemò in bocje il savôr dal mandolât, al è normâl metisi a filosofâ sul timp che al passe. Fra un taiut e chel altri la mê riflession dai ultins diis e je stade che no si cjate plui la gubane di une volte.

No stoi fevelant di chê di for, o cognòs cualchi puest a Cividât e su pe Sclavanie dulà che la si cjate inmò buine, chê che o intint jo e je chê industriâl. Par capî ce che o ai voie di dî si à di taiâ un fete di gubane industriâl e, prime di mangjâle, metile dongje a la foto che e je su la scjate.

La fete de foto e je biele, si viodin i pignûi, la ue passe, i tocuts di cocule e di nole, la fete vere, chê che e je stade juste taiade, e à invezit dentri un paston di robe dolce, sperin almancul fat cui stes ingredients...

Ma no je dome la estetiche che e je cambiade, al è il savôr che nol è plui chel.
Forsit parcè che un timp e jere artesanâl e cumò e je industriâl.

Ma il biel al è che une volte, cuant che e jere buine, e vendeve dome ca, cumò e vent par dut e no si fâs masse fature a cjatâle intai centris comerciâi ator pal marimont. O imparin il marketing e o disimparin a fâ lis robis ben.

Prin salt dal crot: mi àn dite che cuant che si comence a disi robis tant che "ai miei timps sì che la gubane e jere buine, migo come vuê...", aromai si stâ lant di ribe jù cui agns...

Secont salt dal crot: ancje se o mi lamenti de gubane, sul slivoviç no ai nuie ce dî.

Viene o Vignesie?

2007-12-29T23:57:00.000+01:00

Par tradizion il prin dal an, tor misdì, o nin a cjase dai miei a fâ i auguris e a gustâ.
Ogni volte lis robis a somein simpri compagnis scuasit che a fossin une fotocopie.

Di cualchi an in ca però e je une robe che e dâ un fastidi che mai a gno pari: pe television no fasin plui viodi il conciert dal prin dal an!
O miôr al puest dal conciert vêr, chel di Viene, a fasin viodi chel di Vignesie cun dome musiche taliane. Al puest dal Donau Blu di Strauss a fasin il Nabucco, al puest de Marcie di Radezky a metin il prindis de Traviata.

Magari la musiche e je biele istès, ma la robe no i somee compagne. I prins agns al à viodût bruntulant la diferide il dopomisdì ma ae fin al à cjatât la soluzion: viodisi la direte su la television slovene tulugnant dut il timp cuintri il canone RAI che nus tocje paiâ.

Dopo dusinte agns nus tocje ancjemò jessi chi a sielzi fra Viene e Vignesie.

Mandulis e anguriis a ducj. Viva Verdi e bon principi!

Regâl di Nadâl

2007-12-23T23:52:00.000+01:00

Lis fiestis di Nadâl a son un periodi particolâr dal àn. A son lis zornadis plui curtis, al è rivât il frêt e sigurementri i antropolics nus contaressin che la fieste cristiane si je inseride su fiestis e tradizions une vore plui antighis. Vuê dut câs al è il consumisim che al fâs di paron: ju ducj a spindi e a comprâ!

Il Nadâl al è però une altre robe se si àn in cjase dai fruts. Il mê plui grant di agns a 'nd à cuatri, lui e la mari a àn traficât in lunc e in larc par fâ il presepi e l'arbul e cumò o sin in spiete di Babbo Natale.
Un biel post su chest personaç e sul so non lu veve fat timp indaûr Janez, probabilmentri al corispuindarês al nestri San Nicolau che però nol ven la gnot di Nadâl ma ai prins di Dicembar (prime di Sante Luzie).
A dì il vêr, i regâi di Nadâl a mi no mi ju puartave Babbo Natale ma al jere Gjesù bambin (in persone).

Tornant a i miei fruts, chel plui grant vuê mi clame in bande e mi dîs:
“Papà, sâstu ce che o ai domandât a Gjesù bambin”
Jo o savevi benissim ce che i veve domandât e che cu là mari al veve preparât une letarute dulà che al veve disegnât il regâl di vê, un dinosaur vert (che jo o ai za comprât di cualchi dì).
“No, no sai, ce i âstu domandât?” i ai rispuindût
e lui sot vôs mi dîs “Un robot”
Un robot?! E dulà lu cjatio un robot cumò? Alore o ai cirût di spiegai:
“Viôt che tu âs fat la letarute dulà che tu i âs domandât un dinosaur”.
“No” mi à dite “il dinosaur lu ai domandât a Babbo Natale, a Gjesù bambin o ai domandât un robot”
La colpe lu sai, e je dute di chei sacramentâts di nonos che i devin vê contât che a Nadâl al ven ancje Gjesù bambin.
No sai ancjemò cemût che o risolvarai la cuestion.

La tutele

2007-12-19T23:02:00.000+01:00

No a ducj e je lade ju la aprovazion de gnove leç regjonâl su la lenghe furlane. Intant che o spietin di capî ce che e dîs verementri e di viodi trops bêçs che e vignaran stanziâts par metile in vore, o vin savût che e je in preparazion une gnove propueste di leç che un grup di conseîrs regjonâi a stâ preparant par corezi chel che al è stât fat. E je une propueste bipartizan e monoetniche che e somee plasê un grum a plui di cualchidun. Prin firmatari l'onorevul Gabane Ledrose che nus à contât di jessi simpri stât favorevul a une vere tutele de lenghe furlane, tal rispiet di ducj e cence pesâ su lis spesis regjonâls. La propueste di leç e à l'ambizion, secont lui, di deventâ un model pe tutele di dutis lis lenghis minoritariis talianis e parcè no europeanis.

Par une plui clare comprension il test al è stât voltât par furlan, visaitsi dut câs che chê che val e je dome la version taliane.

Gnovis normis pe tutele e pe promozion de lenghe e de culture furlane

art. 1 (Finalitâts)

La sole lenghe ufiziâl de regjon e je che taliane.

art. 2 (Tutele de lenghe furlane)

Se dut câs cualchidun, tal rispiet dal articul 6 de costituzion, de convenzion europeane su lis lenghis regjonâls e sore dut dal art 1 di cheste leç, dentri cjase sô, cence dâ fastidi a nissun, al à voie di fevelâ par furlan, al è libar di fâlu.

art 3 (Grafie)

Tai limits dal articul 1 de leç ducj a son libars di doprâ la grafie taliane.

art 4 (Struments di tutele dal patrimoni linguistic de regjon)

abolît

art 5 (Insegnament scolastic de lenghe furlane)

Tai limits de leçs statâls, de autonomie scolastiche, dai fonts regjonâi, tignint cont dal efiet sere e dal niño, al di fûr dal orari scolastic e su richieste di almancul la totalitât dai gjenitôrs e dai insegnants, (simpri che a metedin lôr i bêçs e che si paiedin il riscjaldament), nol è dal dut vietât l'insegnament de lenghe furlane par un massim di 1 ore di cincuante minûts a cuadrimestri.

art 6 (Programs televisîfs in lenghe furlane)

La Regjon, cuant che covente, e je autorizade a fâ dai incuintris cu la dirigjence des emitents statâls par rimandâ la date di metude in vore di chel che al proviôt la leç 482 dal 1999.

art 7 (Toponomastiche)

Prin di là cu la bombolete spray a gambiâ il non sui cartei dal paîs si à di domandâ il parê preventîf dal ARLEF. La spese pes bobolutis no à di pesâ su la publiche aministrazion.

art 8 (Normis finanziariis)

I bêçs che a coventaran pe atuazion di cheste leç, tignint cont dal disvilup armonic de regjon e cun voli compensatîf, a vignaran cussì ripartîts: metât a laran ae Universitât di Udin e as altris associazion che storichementri a lavorin par prudelâ il furlan, i doi tierçs a laran a associazions e ents cun sede tal cjâf lûc regjonâl che a lavoredin pe atuazion dal articul 1 de normative.

Compits di Nadâl

2007-12-18T23:24:00.000+01:00

Ancje a mi mi tocje fa il compitin di Nadâl di chel cjan dal osti di Dree. Ve ca lis rispuestis a la cjadene di sant antoni

Trê adjetîfs par descrivi il to blog:
braurin, inçussît, straneât

Trops blogarìns âstu cognossût di persone?
Dome un e al jere un bocon.

Cuâl blogarin varessitu gust di cognossi di persone?
Jo cun che intate li no mi impaci

Cuâl isal il prin blog che tu leis la buinore?
Dipent dai feed su la bare di drete... Une volte al jere il furlanist, cumò se un al à voie di cjatâ simpri alc di gnûf al va là di Jajo

Di cuâl blog tu fiestezaressistu la sieradure?
Pâs e amôr fradi, o sin sot Nadâl

Fâs talent scout: lancie un zovin blogarin-promesse.
So ai di fa un non o disarès cîl glaçât.

La cjadene a passe a cui che al passe di ca e nol è à ancjemò fate.

Mister bisiac

2007-12-15T21:27:00.001+01:00

Fasint un zîr in biciclete, di Pieris a Dael lant dopo a finîle a Marian, in pôc timp, si passe pai paîs dulà che a son nassûts Fabio Capello, Enzo Bearzot e Dino Zoff.

Cemût mai tancj di lôr cussì brâfs cussì dongje? Ise par vie dal aiar bon, dal vin just o nome par câs?

Fat al è che chei trê ca, sedi come zuiadôrs che come alenadôrs, a àn vinçût dut chel che a podevin vinci.

Cumò che chel plui zovin al è deventât alenadôr de Ingletiere mi ven iniment une storiute su di lui di cualchi an indaûr.

Al sarà stât tal '93 o tal '94 cuant che une zovine des bandis di Manzignel e jere stade ricoverade tal ospedâl di Udin par jessi operade.

E veve si e no un vincj agns e fra lis feminis de sô cjamare, in chês bielis cjamaris di ospedâl plenis di jets, e cognòs une vecjute che e je la agne di Capello, ancje jê li ricoverade.

In chê volte i zuiadôrs dal Milan, i Maldini, i Costacurta, i Albertini, a jerin ancjemò zovins e biei e la frute e pense ben di dâ ae agne di Capello une letarute pal alenadôr dulà che i contave, che jessint une vore timide e cence morôs, e varès vût tant gust di cognossi cualchidun dai zuiadôrs dal Milan e i domandâve se lui la podeve judâ.

Al passe cualchi dì e subit dopo la operazion la agne di Capello i puarte la letare di rispueste dal alenadôr.

Inte buste al veve metût dentri lis fotos dai zuiadôrs che i vevin fat une dediche e la firme, e dopo, scrit a man, lui i spiegave che al jere dome l'alenadôr e che ancje se nol veve masse plasê che i siei zuiadôrs a vessin masse distrazions, pes morosis, aromai, si rangjavin di bessôi. Le saludave di cûr e i faseve i auguris di vuarision.

A son chês piçulis robis che un personaç public al à probabilmentri simpri il dovê di fâ ma che, une volte fatis, a fasin simpri plasê.

Salt, onest e cuintribandîr

2007-12-03T23:07:00.000+01:00

Une des robis che un Stât al à la usance di fâ sui soi confins al è chel di meti des stranis tassis su lis robis che a vegnin di fûr. La cuestion e ven par solit justificade cu la difese dal interès economic de nazion. La int di confin a ven clamade a fâ la vuardie, a patî e al stes timp a trasgredî chestis imposizions.

Sedi la difese dal confin che la sô trasgression e deventin cussì part de lôr culture, dal lôr DNA. La trasgression si clame cuintribant.

Des nestris bandis il confin al esist di secui. Ogni tant si sposte un pôc di une bande un pôc di chê altre e ogni tant al cambie il Stât di là, ma il confin al reste simpri avonde dongje e si pues propit disi che la tradizion dal cuintribant e sedi secolâr.

Al è un cuintribant fat cu la furbarie dai contadins, un piçul cuintribant, chel grant al è lassât ai sorestants.

Al ven stuzigât di tassis stranis, une volte il cuintribandîr al cjapave un sac di rîs par puartâlu di lâ dal Judri e tornâ di ca dopo vêlu trasmudât in sâl, ogni tant i carabinîrs lu cjapavin e lu metevin in preson par un pôc.

La tradizion e je cambiade e si è evolude cul timp. Jo mi visi che cuant che di frut gno pari mi puartave su a Cjaurêt a fâ benzine tornant a cjase si platavin lis bistechis e la spongje. Al confin i finançots a secuestravin dut ce che cjatavin, no dome i sigarets ma ancje i fulminants.

In chel timp l'interès de nazion cuintri il nemì trist e comunist al passave pai solfarins!

Lôr dal rest, "il nestri nemì", a vignivin di ca a comprâsi scarpis e blujeans. A 'nd metevin su doi o trê, un parsore di chel altri, par puartâju a cjase lôr.

Pal cuintribandîr al è un pôc dificil capî cheste storie dal nemì, ancje se il Stât, almancul di un dusinte agns in ca, al à sburtât une vore su la idee che di là dal confin al è il nemì, che di là a rivaran lis invasions e che di là e rivarà la vuere, (ma se propit o nin a cirî il pêl tal uf al sarès di disi che, almancul intai ultins secui, lis vueris e lis invasions lis vin simpri tacadis nô, al è che no son ladis dutis dretis...)

In ogni câs vuê lis robis a son cambiadis e il confin al è colât. Ise finide cussì la tradizion secolâr dai cuintribandîrs?

Mi sa che agns e agns di amôr patrio insegnâts ae int di confin a àn fat vignî su des altris frontieris propit dentri di nô. A son masse chei che no son nie tolerants cui forescj, specialmentri cui sclâfs. Ma se cheste stupiderie e je stade ben ben cjalcjade dentri la nestre culture, parcè che la difese dal confin cuintri il nemì e veve di fâ part dal nestri DNA, no stin a dismenteâsi che ancje il cuintribant al è tal nestri patrimoni gjenetic!

E cheste volte si trate di cuintribandâ, dentri chescj confins imagjinariis, ideis di tolerance, di justizie e di avualiance. Cu la nestre abilitât o vin di freâ i gjendarmis che a son ancjemò dentri di nô come che, di brâfs cuintribandîrs o vin simpri fat, parcè che ae fin il nemì no dome nol è trist ma nancje nol esist.

Al è un cuintribant etichementri alt che al fâs ce che il cuintribant, cu la sô anarchie, al à simpri fat: al fâs colâ i confins.

Passât lontan

2007-11-26T22:16:00.001+01:00

Il premi San Simon di chest àn al è stât vinçût dal romanç “Il cop” di Laurin Zuan Nardin. Par podè leilu al tocjarà spietâ un anut parcè che al vignarà dât fûr cu la premiazion dal àn che al ven.

Ma ancje cence vêlu let mi ven di disi alc su la motivazion cun che e je stade sielzude la opare premiade:
“Dai tescj ch’a son rivâts a la jurie, al è chel ch’al pant une cierte inventive. Ancje se al çuete in cualchi motivazion e in cualchi passaç, la storie e je tratade cun avonde suspance. E tache ben, dal particolâr al gjenerâl, e cul truc dai pensîrs di ogni protagonist, al mene il letôr a sclarî il cuadri da la vicende. Al podeve zuiâse miôr tal finâl, cuant che dut si scuvierç masse in premure. La lenghe e je avonde coerente a part il doprâ il passât lontan che no je une carateristiche dal furlan. La prose e je une vore sute cence nainis descritivis, ma cun cualchi soluzion retoriche a la buine”.

Al è interessant il coment sul passât. O dîs subit che intal fevelâ jo no ai mai sintût doprâ il passât e a contâle dute no savevi nancje che al esistès prime di scomençâ a lei alc par furlan! Cuant che o cjacari jo o dîs che Napoleon al è nassût in Corsiche e no che al nassè in Corsiche.

Jessint dut câs che ultimementri o ai scomençât a lei alc de narative furlane o ai ancje di disi che un pôc mi soi ancje abituât a chestis formis. Tal scrit si cjatin.

Forsit la zurie, che e veve personaçs no di pôc tant che Cappello, Carlo Tolazzi, Mario Turello e Franca Mainardis e à voie di sburtâ par un cambiament? La lôr idee e podarès jessi interessante, doprâ l’imperfet ancje tal scrit come che si fâs tal orâl.

Curiôs o ai tirât fûr lis lôr oparis che o ai cjatât e che, se us plâs, us consei di lei.

La çupiçane Mainardis in efiet no mi somee che e dopredi il passât, ma viodin invezit cemût che al tache “Dome cul cjâf, dome cul cûr” di Tolazzi, premi San Simon 1994:

“Nisçun rumôr. Nencia un brut sium, nuia, però Clelia a era dismota, duta sudada, e a sflasava cul còur ch’a la scjassava dal di denti. A saltà fòur dal iet e cjaminant bielpaln su las vecjas brèas dal palment, a passà devant da cjamara di Giulio.”

o ancje il biel “La salamandrie tal fûc”, simpri di Tolazzi, premi San Simon 1995:

“Al scugnì provâ dôs trê voltis a fâ flame par piâ il spagnolet, ce ajar dispetôs, ma ae fin il tabac al cjapà. Berto al tirà une bocjade ficjant te sachete i fulminants, e intant ch’al soflave fûr il fum ingrispant la muse, al scjassà par tiare la prime cinise.”

e no dismenteìnsi il saç “Il Brevet” di Mario Turello, premi San Simon 2001, ve la prime rie:

“Giulio Camillo Delmino al nassè a Puart Gruâr tal 1480.”

In sumis si podarà criticâ il libri di Nardin par un sac di robis ma mi pâr che la storie dal passât no si le sedi inventade lui...

Il prin salt dal crot.
Intal concors a son stadis presentadis 13 oparis e la zurie i à petât ju ben e no mal disint che “nissun di chescj al presentave lis carateristichis di une opare leterarie. Cun di plui i autôrs a àn scrit cjalant masse ai timps passâts, dismenteant cussì di tocjâ temis che si fevele in dì di vuê. A àn zontât ancje che chest gjenar di leterature, vignude fûr dal premi di cheste edizion, no à nissun contat cu la produzion taliane e tant mancul cun chê europeane.”

A part che il discors che une opare leterarie e vedi di fa une gare no mi somee tant juste e je ancje vere che se un al à voie di publicâ un libri al à di spindi dal so e scrivint par furlan no son di sigûr sperancis di rivâ a vendilu. Pensant ae fature che i autôrs e varan purpûr fat, e pensant che statistichementri no saran dutis e 13 des cragnis, al è un pecjât che no si rivedin a lei chestis (e altris) oparis. Al dì di vuê si podaressin magari publicâlis in version eletroniche e metilis a disposizion su Internet.

secont salt dal crot
Se o veis voie di lei o cjatais "La salamandrie e il fûc", "Il Brevet" e altris libris tra i e-libris di Friul.net.

A torzeon di bessôi

2007-11-17T23:11:00.000+01:00

Nol è facil cjatâ materiâl par zovins par furlan e cuant che mi è capitât in man "Òlmis, diari torzeon par cognossi e par fâsi cognossi" de Societât Filologjiche Furlane di chest àn lu âi cjalât cun curiositât.

Il pont al è che di fûr si presentave une vore ben parcè che i disens di Sara Nascimben e di Dimitri Fogolin a son une vore biei e in gjenerâl la impostazion grafiche e je simpatiche e va benon.

Il probleme al è cuant che si van a lei i tescj metûts dentri.

L'argoment sielzût par chest an al è il mangjâ inte art, par che si son impensâts ben di meti dentri des robonis come la ricete de mignestre di râfs, dai cocins riplens o dai miluçs cuets.

Nol podeve mancjâ cualchi vecjo proverbi furlan, tant par indreçâ ben la nestre zoventût, des robis come "Cui che nol stente al mangje il çuç e al lasse la polente" o "Poleçs e fertaie miôr che no ufiei".

E sì! Propit mi impensi il tipic frutat furlan, magari di chei che scomencin a jessi sdrondenâts dai prins ormons, cu la muse plene di bruscs, lâ atôr cul telefonin intune man e il diari torzeon inta che altre.

Cemût si disial? Sbaliât il target?

Su e ju pal coredôr

2007-11-15T23:09:00.000+01:00

Trops chilometris varaio fat su e ju pal coredôr cul piçul in braç?

No je ni la prime ni la ultime volte che nus à sveât vie pe gnot vaint come un disperât. Ce varaial vût? I dincj, mal di panze o cuissà ce?

La mari e à provât a dai di tete par consolâlu un pôc ma aromai di lat no 'nd è plui tant. E alore lu ai cjapât su jo che tant l'indoman o varès tacât vore plui tart.

E vie su e ju pal coredôr a niçulâlu. Parcè che i fruts a son teribii e al tocje figotâju.

Ae fin o sin finîts sdravacâts sul divan no sai plui a ce ore.

Vuê o soi lât indenant dut il dì a cafeine ma cuant che o soi rivât a cjase la sere e il nini mi à fat la musute di ridi, po ben il crot al jere content.

Ma il cocâl Jonathan Livingston tabaial furlan?

2007-11-12T00:45:00.000+01:00

Pe int di mâr il cocâl al è un simbul di libertât. Lôr lu viodin svualâ libar tal cîl, biel, paron des aghis. E par ogni puest dulà che a van a cjatin i cocâi svualâ in alt parsore di lôr.

Nô furlans o viodin il cocâl intune altre maniere, par nô al è chel uciel che cuant che al è frêt al saltuce intai cjamps spelâts zirint di becuçâ alc di mangjâ.

No je une biele figure tant al è vêr par disi di un poc svelt, indurmidît, si dîs che al è un puar cocâl.

Ma cui aial reson? Cuâl isal chel vêr, il cocâl furlan o il gabbiano talian?

Po ben a son ducj doi vêrs, l'uciel al è simpri chel cui siei stes fastidis, e gambie dome un ninin la idee di cocâl che l'om cu lis sôs diferentis feveladis al è rivât a dâsi.

Nô furlans, che di fruts o cjacarin in plui lenghis, o podin gjoldi di diviers ponts di viste cuant che o pensin a un cocâl. O viodin l'uciel biel che al svuale tal cîl, ma o pensin ancje al uciel pagnoc che al zupete par tiere o a cualchi puar cocâl che nus à cumbinât cualchi fastidi te vite di ogni dì.

Se o pierdessin une des lenghis che o savìn o pierdaressin alc di chel che o rivin a evocâ disint cocâl-gabbiano.

Un mût di pensâ vuê di mode al vûl che e ledin difindudis lis bio-diviersitâts sie che sedin semencis o plantis, sie che sedin lenghis. E daûr des declarazions di principi i paîs europeans a son in prime file in cheste difese dai dirits.

Ma fra lis declarazions di principi e chel che si fâs e jê une biele diference. Inte realtât al è un pensâ comun, magari no dite in maniere clare ma une vore praticât, che al pense che lis robis a vedin di jessi lassadis lâ cussì come che son parcè che nol è economichementri convenient difindi chescj dirits. No si lu dîs ma si pense che lis fuarcis dal marcjât libar a sedin simpri buinis di selezionâ, in mût darwinian, ce che al è miôr e duncje di indreçâ l'ûs des lenghis cu la disparizion di chês che economichementri a valin di mancul.

Parcè spindi dai bêçs par insegnâ il furlan che nol covente a nuie? No isal miôr spindiju par alc altri che al rindedi di plui? E no isal miôr passâ diretementri al inglês cussì a vignaran fûr de scuele dai fruts plui utii ae produzion e plui brâfs par frontâ la concorince tal mont globalizât?

Scomencin cul disi che par chestis robis il nivelament fat dal marcjât lassât disberdeât al è simpri in bas e i nestris fruts no passaressin dal cocâl-gabbiano di cumò al sea-gull inglês ma a rivaressin si e no al bird, magari chei brâfs a un white-bird, in fin dai conts imparâ ducj i nons dai uciei nol è economichementri convenient.

E po dopo sino sigûrs che un nivelament in bas dai furlans al fasedi l'interès dal sisteme economic?

Di sigûr o varessin dai furlans consumadôrs mancui dificii di sedusi e o rivaressin a fâju comprâ robe di basse cualitât (ma il marcjât nol vevie di rivâ a selezionâ il miôr?). Ma chest ae fin al sarès dut câs il mal plui piçul, il riscli vêr al è che o varessin ancje un nivelament in bas dai furlans produtôrs.

Sino propit sigûrs che par progjetâ un gnûf machinari, par disegnâ un gnûf model di cjadree o par inventâsi cualchi gnûf cumierç nol judedi il vê une vision plui grande e profonde des robis?

E alore no isal fondamentâl savê ducj i significâts di cocâl-gabbiano (e magari cussì podè cirî di capî ce che al è il cocâl pai americans, pai brasilians o pai cinês)?

Se un timp savê il furlan al jere un segn dal jessi sotan forsit vuê imparâlu e insegnâlu al sarès une maniere par jessi mancul sotan.

Se dopo dut chest nol bastarà, parcè che si sa che lis lenghis a nassin e a muerin, e la onde uniformant nus nivelarà ducj e no savarìn plui ducj i significâts de peraule cocâl, po ben no savarìn nancje di jessi deventâts nô i puars cocâi.

Il crot si sa che nol si ferme e al salte ca e là.

Prin salt: par inglês il cocâl al è il seagull, ma to gull a vûl disi imbroiâ cualchidun fâsint crodi des robis no veris e il puar cocâl che si fâs imbroiâ si dîs gull. Il significât al è simil a chel furlan ancje se a son des sfumaduris difarentis.

Secont salt: Tes storiis di Earthsea de scritore mericane Ursula Le Guin che a son des contis fantasy di magjie cun strions e drâcs, si imagjine che par rivâ a comandâ lis robis i strions a àn di imparâ il vêr non des robis. Par comandâ l'aiar o il mâr si à di cognossi il vêr non dal aiar e dal mâr. Tal mont pensât de Le Guin par comandâ i cocâi-gabbiani-gulls bisugnarès savê il lôr vêr non.

Crots e ribuele

2007-11-05T23:06:00.001+01:00

Mi visi un pôcs di agns indaûr di vê sintût, pe television, lamentâsi dal fat che i crots a stan disparint.

Juste in chel fûr dal barcon de mê cjase di che volte, dal riul li dongje, si sintivin centenârs di crots cracrâ beâts.

Di crots atôr a 'nd è ancjemò une vore.

Disparirano?

Sarano i ultins che o sintarin?

No lu sai ma o pensi che fin che a son a sedi just cracrâ cun lôr e duncje o tachi chest blog.

No promet nie, il blog al è gno e se mi stufi no lu inzornârai masse spes ma intant lu tachi.

(Te foto ribuele e cjastinis. La ribuele no je metude tal butilion tradizionâl ma e jê buine e lis cjastinis a son di Madone di Mont.) Bon viaç!

Provis tecnichis di trasmission

2007-10-29T19:13:00.001+01:00

Bon, cumò ancje il mio blog al è pront, o ai dome di tacâ a scrivi....